شىمكەنت-استانا رەيسى بويىنشا ۇشاق قونار كەزدە قۇسپەن سوقتىعىسقان - دەپ حابارلايدى Dalanews.kz.

1 مامىردا شىمكەنت - استانا باعىتى بويىنشا جولاۋشىلار ۇشاعى قونۋ كەزىندە قۇسپەن سوقتىعىسقان. بۇل جايت رەيستىڭ سوڭعى كەزەڭىندە، ۇشاق استانا حالىقارالىق اۋەجايىنا قونعالى جاتقان ساتتە بولعان.

SCAT اۋەكومپانياسىنىڭ باسپا ءسوز قىزمەتى مالىمەتىنشە، قۇستىڭ ۇشاققا سوعىلۋى سالدارىنان اۋە كەمەسىنىڭ ءبىر بولشەگى زاقىمدانعان. جەدەل تەحنيكالىق تەكسەرىس جۇرگىزىلىپ، زاقىمدانعان بولشەكتى اۋىستىرۋ قاجەت بولعان.

"شىمكەنت - استانا رەيسى قونار كەزدە قۇسپەن سوقتىعىستى. زاقىمدانعان بولشەك اۋىستىرىلۋىنا بايلانىستى استانا - شىمكەنت باعىتىنىڭ جولاۋشىلارى قوناقۇيگە ورنالاستىرىلىپ، ولارعا اۋەجاي تەرمينالىندا تاماق بەرىلدى"، – دەپ ءتۇسىندىردى كومپانيانىڭ باسپا ءسوز قىزمەتى وكىلى.

كومپانيا جولاۋشىلاردىڭ قاۋىپسىزدىگى باستى ورىندا ەكەنىن مالىمدەدى. سونىمەن قاتار، اۋەكومپانيا مۇنداي توسىن جاعدايلارعا بايلانىستى رەيستەردىڭ وزگەرۋىنە تۇسىنىستىكپەن قاراۋعا شاقىردى.

جولاۋشىلار مەن ەكيپاج مۇشەلەرى اراسىندا زارداپ شەككەندەر جوق. ۇشاق شتاتتىق رەجيمدە قونعان، بارلىق جولاۋشى كەرى رەيس كەشىگەتىنىنەن دەر كەزىندە حاباردار ەتىلگەن.