Shymkent qalasy ákiminiń orynbasary qyzmetine Erjan Seitenov taǵaiyndaldy. Ol buǵan deiin qala ákimi apparatynyń basshysy qyzmetin atqarǵan, dep habarlaidy Dalanews.kz.
Qala ákimdiginiń Instagram-daǵy resmi paraqshasyndaǵy málimetke sáikes, QR Prezidenti Ákimshiliginiń kelisimimen jáne Shymkent qalasy ákiminiń ókimine sáikes Erjan Seitenov jańa laýazymǵa taǵaiyndaldy.
Erjan Seitenov 1974 jyldyń 18 qyrkúieginde Qyzylorda oblysynyń Jańaqorǵan aýdanynda dúniege kelgen. Eńbek jolyn 1990 jyly Jańaqorǵandaǵy temirbeton buiymdaryn shyǵaratyn kásiporynda jumysshy bolyp bastaǵan.
2002–2016 jyldary jeke sektorda túrli jaýapty basshylyq qyzmetter atqarǵan.
2016–2021 jyldary Almaty qalasynda jerdi paidalaný men qorǵaýdy baqylaý, jasyl ekonomika jáne turǵyn úi saiasaty basqarmalarynyń basshysy qyzmetin atqardy.
