Ońtústik Qazaqstan oblystyq máslıhatynyń depýtaty Ómirzaq Meldehanov Shymkent qalasynyń ákimi Ǵabıdolla Ábdirahymovtyń jumystaryn synǵa aldy.
Ol oblystyq máslıhattyń qurylys jáne komýnaldyq salany damytý jónindegi turaqty komısıasynyń otyrysynda «Bizge aryz túsip jatyr. Trotýarda velosıped júrgizýge bola ma, bolmaı ma? Óıtkeni biraz azamattar «Qalada velojol salyp jatqandar biz jasaǵan jolaıaq tósenishterin alyp tastap, qaıtadan basqasyn tóseýde. Ǵımarattar men trotýarlardyń arasynda bıik bordúrlar qoıýda. Jaýyn jaýsa, jańbyr sýy bordúrlardan asa almaı kólkip ǵımarattarǵa qaýip tóndiredi ǵoı» dep shaǵym jazǵan eken. Osy máseleni kim túsindirip bere alady? Negizi velojol qalaı salynýy kerek? Qandaı talaptar bar?» dep surady.
Budan habar joq pa, áıteýir oblystyq ákimdikke qarasty Memlekettik sáýlet-qurylys baqylaýy, Jolaýshylar kóligi jáne avtomobıl joldary, Qurylys basqarmalarynyń basshylary atalǵan máseleni anyqtap, jazbasha jaýabyn beremiz dep qutyldy. Degenmen, olar tratýarda adamdarmen birge velosıpedpen qatynaýǵa bolmaıtynyn aıtty.
– Baýyrjan Momyshuly kóshesiniń boıynda kezinde kásipkerler ǵımarattarynyń aldynan ótetin trotýar bólikterine ózderi tósegen plıtalardyń barlyǵyn alyp tastap, qaıtadan tósenish salyp jatyr. Biraq, qujattaryn surasa, eshqandaı qujat kórsetpegen. Ne ruqsat qaǵazy, ne bir nusqaýy joq. Erteń taǵy da anany alyp tasta, mynany alyp tasta dep basqa talap qoıýy múmkin. Italıada avtobýstar júretin joldar bir bólek, trotýar bir bólek, velojol bir bólek. Reseıde de sondaı. Qazaqstanda qandaı sonda? Sonda bizdiń oblysta baqylaý joq pa, ne bul?! Álde bitirip, búldirip bolǵan soń baqylaý jasalyna ma? Trotýarda velosıped júrgizýge bolmaıtyn bolsa, bizde baqylaý da, qadaǵalaý da joq, qalaǵan adam qalaǵan nársesin jasap jatyr ma? Burynǵy plıta tósenishterdi alyp tastaýdyń ne qajeti bar? Qazirgilerin sapasyna qarap-aq bilýge bolady, úgitilip qalady. Nege bizdiń qalada únemi baqylaýsyz jańa qurylystar júre beredi? Búdjetten qarjy qalaı bólinip jatqanyn bir Qudaı biledi... Oǵan tender jarıalanǵan ba? Qarjy kóp bolsa, jumsaıtyn qanshama nysan bar ǵoı, – dedi «Nur Otan» partıasynyń Shymkent qalalyq fılıalynyń tóraǵasy Ómirzaq Melehanov.
rgmedia.kz
