Shymkent ákimi Ǵabit Syzdyqbekov jýyrda ustalǵan Arai Esenbekke qatysty pikir bildirdi, dep habarlaidy Dalanews.kz.
Jýrnalister brifingte ákimnen osy istiń mán-jaiyn suraǵan.
"Tek zań aiasynda sheshiledi. Sebebi biz tergeý organy emespiz. Quqyq qorǵaý organdary jumys jasap jatyr. Kim aq, kim qara ekeni sot sheshimimen aiqyndalady", - dedi qala ákimi búgin ótken brifingte.
Aldyn ala málimetke sáikes kúdikti ákimdik qyzmetkerinen 10 million teńge kóleminde aqsha talap etken.
"Ol bul somaǵa áleýmettik jelilerde memlekettik organdardyń qyzmetin qaralaityn materialdardy taratpaýǵa ýáde bergen. Bul jait boiynsha qylmystyq is qozǵaldy. Tergeý aiasynda kúdiktiniń turǵylyqty jeri men keńsesinde tintý júrgizilip, nátijesinde elektron qurylǵylar men ózge de zattai aiǵaqtar tárkilendi.
Kúdikti ýaqytsha ustaý izoliatoryna qamaýǵa alyndy. Qazir oqiǵanyń barlyq mán-jaiyn anyqtaýǵa baǵyttalǵan tergeý júrgizilip jatyr", - dedi IIM ókilderi buǵan deiin.
