شىمكەنت اكىمى عابيت سىزدىقبەكوۆ جۋىردا ۇستالعان اراي ەسەنبەككە قاتىستى پىكىر ءبىلدىردى، دەپ حابارلايدى Dalanews.kz.
جۋرناليستەر بريفينگتە اكىمنەن وسى ءىستىڭ ءمان-جايىن سۇراعان.
"تەك زاڭ اياسىندا شەشىلەدى. سەبەبى ءبىز تەرگەۋ ورگانى ەمەسپىز. قۇقىق قورعاۋ ورگاندارى جۇمىس جاساپ جاتىر. كىم اق، كىم قارا ەكەنى سوت شەشىمىمەن ايقىندالادى"، - دەدى قالا اكىمى بۇگىن وتكەن بريفينگتە.
الدىن الا مالىمەتكە سايكەس كۇدىكتى اكىمدىك قىزمەتكەرىنەن 10 ميلليون تەڭگە كولەمىندە اقشا تالاپ ەتكەن.
"ول بۇل سوماعا الەۋمەتتىك جەلىلەردە مەملەكەتتىك ورگانداردىڭ قىزمەتىن قارالايتىن ماتەريالداردى تاراتپاۋعا ۋادە بەرگەن. بۇل جايت بويىنشا قىلمىستىق ءىس قوزعالدى. تەرگەۋ اياسىندا كۇدىكتىنىڭ تۇرعىلىقتى جەرى مەن كەڭسەسىندە ءتىنتۋ جۇرگىزىلىپ، ناتيجەسىندە ەلەكترون قۇرىلعىلار مەن وزگە دە زاتتاي ايعاقتار تاركىلەندى.
كۇدىكتى ۋاقىتشا ۇستاۋ يزولياتورىنا قاماۋعا الىندى. ءقازىر وقيعانىڭ بارلىق ءمان-جايىن انىقتاۋعا باعىتتالعان تەرگەۋ جۇرگىزىلىپ جاتىر"، - دەدى ءىىم وكىلدەرى بۇعان دەيىن.
