Óńirdegi mektepterde jańartylǵan mazmundaǵy bilim berý júiesine kóshý isine basa nazar aýdarylýda. Bul baǵytta da aýqymdy jumystar atqaryldy.
Máselen 5 379 muǵalim kýrstan ótip, jańartylǵan mazmundaǵy 1,5 million oqýlyq satyp alyndy. Qoryta aitqanda, sońǵy tórt jyldyń kóleminde 25 myńnan astam muǵalim jańartylǵan baǵdarlama boiynsha kýrstan ótti.
Sonymen qatar úsh tildi bilim berý baǵdarlamasy boiynsha da jumystar atqarylýda. Aimaq basshysy, 2019-2021 jyldary kóptildilikti damytý maqsatynda keshendi jospar jasalǵanyn atap ótip, atalmysh baǵdarlama aiasynda frantsýz, nemis tilderi de oqytylatynyn jetkizdi.
Aldaǵy ýaqytta mektepke deiingi, jalpy orta, tehnikalyq jáne kásiptik bilim berý júiesinde sabaq beretin 3700 muǵalim qaita daiarlaýdan ótedi.
Sondai-aq bilim berý keshenderiniń infraqurylymyn damytý da aktýaldy bolyp tur. 2022 jylǵa deiin respýblikalyq biýdjettiń esebinen 3,6 myń orynǵa arnalǵan bes mektep salynady. Bul nysandar Semei, Ridder qalalary men Abai aýdany Qaraýyl aýylynda boi kóteredi.
Aǵymdaǵy jyly 2900 oryndyq eki mektep qoldanysqa beriledi. Sonyń biri Óskemende salynsa, ekinshisi Tarbaǵatai aýdany, Aqjar aýylynda salynady.
Budan bólek josparǵa sáikes Semeidegi mekteptiń innovatsiialyq jobasy qolǵa alynady. Onda oqýshylar álemdegi úzdik tehnologiialardy meńgeredi. Al oblys ortalyǵynda 700 oryndyq mamandandyrylǵan daryndy balalarǵa arnalǵan matematika mektebi boi kóteredi. Onyń ishinde 320 bala aýdandar men qalalardan keledi.
