Shyǵys Qazaqstan men Belarýs ózara tiimdi yntymaqtastyq ornatýda
Belarýs Qazaqstan úshin strategiialyq seriktes ári odaqtas. Maýsym aiynyń sońynda Úkimet basshylary saýda-ekonomikalyq, aýyl sharýashylyǵy, energetika, kólik-logistika, qurylys salalaryndaǵy yntymaqtastyqtyń, ónerkásiptik kooperatsiia men bilim berýdiń, sondai-aq, óńirlik ózara is-qimyldyń ózekti máselelerin talqylady.
Pavel Ýtiýpinniń Shyǵys Qazaqstan oblysyna alǵashqy sapary barysynda Semei qalasynyń ákimi Baqytjan Baihametovpen kezdesip, Abaidyń tarihi-mádeni murajai-qoryǵyna, "SemAZ" JShS aýyl sharýashylyǵy jáne júk tehnikasyn óndirýge mamandandyrylǵan kásiporynǵa, "Vostok-Moloko" JShS sút óńdeý kásipornyna, "Belorýsskaia shina" JShS bardy. Sonymen qatar, óńirdegi Belorýs diasporasymen kezdesý ótkizdi. Oblys ákimdiginde óńir basshylyǵymen jáne aýyl sharýashylyǵy, kásipkerlik vedomstvolarynyń ókilderimen kelissózder ótkizdi. Talqylaý barysynda ShQO ákiminiń orynbasary Erjan Nurbaevpen ekijaqty yntymaqtastyqtyń keń aýqymdy máseleleri boiynsha pikir almasty.
Belarýs diplomaty qazaqstandyq tarappen aýyl sharýashylyǵy, atap aitqanda, traktor, kombain jasaý salasynda tabysty kelisimder bar ekenin atap ótti. Taraptar traktorlarǵa arnalǵan jekelegen toraptar men agregattardy óndirý máselesin talqylady. Minsk traktor zaýyty "SemAZ" JShS-men biresip, osy baǵytta jumys isteýge jáne óndiristi oqshaýlaýdy ulǵaitýǵa kómektesýge daiyn. Jalpy, Shyǵys Qazaqstan jáne Belarýs taraptarynyń qazirgi ýaqytta Qazaqstanda óndirilmeitin qajetti aýyl sharýashylyǵy tehnikasyn shyǵarýdy jolǵa qoiý boiynsha ilgerleýshilik bar. Sonymen qatar, shyǵysta qolaily óndiristik alańdar da joq emes.
Úkimet basshylary kezdesken kezde QR Premer-ministri Asqar Maminniń Qazaqstandaǵy sút-taýar fermalaryn salý qajettiligi týraly usynysy jeke taqyryp boldy. Sondyqtan Belarýstiń Tótenshe jáne Ókiletti Elshisi Pavel Ýtiýpin respýblikada naqty tapsyrys berýshiniń tehnikalyq tapsyrystaryna sáikes tolyq aiaqtalǵan STF sala alatyn jobalaý jáne qurylys uiymdary bar ekenin habarlady. Elshi Shyǵys Qazaqstan delegatsiiasyn osy joba aiasynda salynǵan túrli fermalardy óz kózimen kórý úshin Belarýske kelýge shaqyrdy. Taraptar memlekettik-jeke menshik áriptestik aiasynda osy baǵyttaǵy yntymaqtastyq múmkindigin talqylady.
Erjan Nurbaev óńirdiń kúnbaǵys tuqymyn óndirý boiynsha, sút óndirý boiynsha birinshi orynda, et óndirý boiynsha ekinshi orynda, sondai-aq, mal sharýashylyǵy ónimderi boiynsha kóshbasshylar qatarynda ekenin atap ótti. Sondyqtan birlesken jobalarǵa qatysýdyń erekshe máni bar.
Belarýs Elshisi Pavel Ýtiýpin Minsk avtomobil zaýyty Tótenshe jaǵdailar departamentterin qaita jaraqtandyrýǵa arnalǵan zamanaýi órt sóndirý tehnikasyn jetkizý máselesi boiynsha Qazaqstanmen belsendi yntymaqtastyqta ekenin jetkizdi. Osyǵan bailanysty kásiporyn Shyǵys Qazaqstanda órt tehnikasyn paidalaný múmkindikterin qarastyrý úshin kommertsiialyq usynys daiyndady. Belarýs Respýblikasynyń Tótenshe jáne Ókiletti Elshisi osy baǵytta óńirmen yntymaqtastyqqa úmit bildirdi.
Sonymen qatar, taraptar aǵash óńdeý óndirisi, týrizm salasyndaǵy ózara is-qimyldy talqylady. Diplomattar Shyǵys Qazaqstan, Mogilev jáne Brest oblystary arasyndaǵy yntymaqtastyq boiynsha jol kartasyn jasaýǵa kelisti. Sonymen qatar, Belarýs Elshisi ósimdik sharýashylyǵy, mal sharýashylyǵy, veterinariia sýbektileri boiynsha ózara túsinistikke qol jetkizý úshin Qazaqstanda jyl saiynǵy "Belagro" halyqaralyq aýyl sharýashylyǵy kórmesin ótkizýdi usyndy. Kezdesý sońynda taraptar ózara tyǵyz qarym-qatynastardyń odan ári damýyna, ózara tiimdi jańa jobalardyń iske asyrylýyna senim bildirdi.
