EKSPO-2017 aiasynda Astanada qazaqstandyq qolónershiler men dizainerlerdiń «Qala kóshpendileri 2.0» atty kórmesi ashyldy.
27-31 maýsym aralyǵynda EKSPO-2017 kórmesindegi Future Creative britandyq mádeni baǵdarlamasy aiasynda Qazaqstan Respýblikasy Ulttyq murajaiynda «Qala kóshpendileri 2.0» atty kórme ótýde. British Council (Britandyq keńes) atalmysh is-sharany «Shevron» kompaniiasynyń qoldaýymen jáne de Atomik Architecture Qazaqstan-Britan stýdiiasymen birlese otyryp uiymdastyryp otyr. Kórme aiasyndaǵy eksponattardyń barlyǵy qazirgi zamanǵy qala kóshpendisine tán biregei mádeni kodty birlese izdeýdi kózdeidi.
«Qala kóshpendileri 2.0» - qazaqstandyq qolónershiler men dizainerlerdiń qolynan shyqqan jumystardyń biregei kórmesi. Kórme eki shyǵarmashylyq toptyń ózara dialogyna arnalǵan alań bolyp tabylady: bir jaǵynan qolónershiler ulttyq mádeni murany usynsa, ekinshi jaǵynan dizainerler san alýan eksperimentterdi jasap, jańa pishinderdi oilap tabady.
«Qala kóshpendileri» kórmesi Qazaqstan men Ulybritaniianyń shyǵarmashylyq salasyndaǵy jemisti yntymaqtastyǵynyń tamasha mysaly bolyp tabylady. Elderimiz arasyndaǵy seriktestik, sonyń ishinde mádeniet salasyndaǵy yntymaqtastyǵymyz EKSPO-2017 kórmesinen keiin budan da kúshti nyǵaia túsip, birlesken jobalar men bastamalarǵa jol salady dep úmittenemiz»
- dep atap ótti Qazaqstandaǵy Ulybritaniia elshisi doktor Kerolin Braýn.
Kórmege qoiylǵan nysandardyń barlyǵy dizain salasynda mamandandyrylǵan britandyq oqý mekemeleriniń, atap aitqanda, Londondaǵy Kingston ýniversiteti jáne Sent-Martins ýniversiteti ókilderiniń atsalysýymen daiyndaldy. Kingston ýniversitetiniń magistranttary Qazaqstannyń kóshpendilik kezeńnen bastap osy kúnge sheiingi mádeni dástúrleriniń ózgerisin halyqtyń tamaqtaný mádenietine, ishki bólmeniń uiymdastyrylýy men zattardy saqtaý júiesine zer salý arqyly zerttedi. Osy zertteýdiń negizinde qazaqstandyq dizainerler men qolónershiler «Qala kóshpendileri 2.0» kórmesine usynylatyn obekterdiń tujyrymdamasyn ázirledi, keiin bul tujyrymdamalar Sent-Martins ýniversitetindegi oqytýshylardyń atsalýymen aiaqtap bitirildi.
«Qala kóshpendileri 2.0» kórmesi qazirgi zaman kóshpendileriniń ómir súrý ortasyn ashyp kórsetýdi kózdeidi. Olardyń turmysy qalai ózgermek? Qala kóshpendileri bir qaladan ekinshi qalaǵa, bir elden ekinshi elge saiahattaǵan kezinde ózderimen birge neni ala júredi? Olardyń úi ishindegi usaq-túiek buiymdar qandai dúnielerden quralǵan: zamanaýi dúkenderden satyp alynǵan zattardan ba, álde ótkenniń murasynan ba? Qala kóshpendisi úshin ne mańyzdyraq: zattyń beretin paidasy men yńǵailyǵy ma, álde tóltýma biregeiligi me?
«Qala kóshpendileri 2.0» kórmesi 2016 jyly Londonda ótken «Qala kóshpendileri» kórmesiniń jalǵasy bolyp tabylady. 12 myńnan asa adamnyń qyzyǵýshylyǵyn týdyrǵan bul alǵashqy kórme Londondaǵy Halyqaralyq sáýlet festivali jáne Halyqaralyq dizain festivaliniń baǵdarlamasyna engizildi.
