Memleket basshysy "Qazaqstan Respýblikasynyń keibir zańnamalyq aktilerine dene shynyqtyrý jáne sport, sondai-aq, artyq zańnamalyq reglamentteýdi bolǵyzbaý máseleleri boiynsha ózgerister men tolyqtyrýlar engizý týraly" Qazaqstan Respýblikasynyń zańyna qol qoidy. Bul zańǵa sáikes endi sheteldik legionerlerdi halyq asyramaidy,- dep habarlaidy Dalanews.kz.
Zań memlekettiń dene shynyqtyrý jáne sport salasyn damytý saiasatyn jetildirýge baǵyttalǵan.
"Ýákiletti organ basym sport túrleriniń respýblikalyq jáne óńirlik tizbesin ázirleidi, joǵarǵy jetistikter sporty túrleriniń tizimin jáne olardy biýdjet esebinen qarjylandyrý tártibin aiqyndaidy.
Basym sport túrleri halyqaralyq arenada qol jetkizgen nátijelerge qarai bekitiledi. Bul – Olimpiada, Paralimpiada, Sýrdlimpiada, Aziia, Paraziia oiyndarynyń baǵdarlamasyna engen sport túrleri, sondai-aq ulttyq sport túrleri", - dep jazylǵan habarlamada.
Sport federatsiialaryn akkreditteýge qatysty erejeler jetildirilgen. Endi olar ulttyq jáne jergilikti sport federatsiialary bolyp bólinedi.
"Sheteldik legionerlerdi biýdjetten jáne kvazimemlekettik sektor sýbektileriniń qarajaty esebinen qarjylandyrýǵa tyiym salynady", - dep jazylǵan habarlamada.
Budan bylai biýdjet qarajaty tek tórt baǵytqa:
- joǵary jetistikter sportyna, onyń ishinde sporttyń basym túrlerine,
- memlekettik dene shynyqtyrý-sport uiymdarynyń qyzmetine,
- buqaralyq sportqa,
- sporttyq infraqurylymdy damytýǵa jumsalady.
Zańǵa "sporttyq daiarlyqtyń ulttyq standarttary" uǵymy engiziledi. Soǵan sáikes sportshylardy tól tanym-túsinigimizge sai tárbielep, olardyń boiyna dástúrli qundylyqtardy sińirýdi kózdeitin biryńǵai daiarlaý standarty ázirlenedi.
Ýákiletti organǵa dopingke qarsy erejelerdi buzǵany úshin shara qabyldaý ókilettiligi beriledi.
