Qazaqstanda sheteldik uiymdardan qarjylandyrý alatyn azamattardyń biryńǵai derekter bazasy qurylady. Tiisti buiryq jobasyn Qarjy ministrligi «Ashyq NQA» portalynda jariialady, dep habarlaidy Dalanews.kz.
Qujatqa sáikes, sheteldik uiymdardan, shetel azamattarynan nemese azamattyǵy joq adamdardan aqsha men ózge de múlik alatyn qazaqstandyqtar bul týraly aqparat berýge mindetti bolady.
«Jobanyń maqsaty – azamattar men zańdy tulǵalardyń qurylymdyq bólimsheleri sheteldik uiymdardan, shetel azamattarynan jáne azamattyǵy joq adamdardan alynǵan aqsha qarajaty men ózge de múlikti alý jáne paidalaný týraly málimetterdi usyný tártibi men merzimderin belgileý. Sondai-aq osyndai málimetterdiń nysandaryn, memlekettik kirister organdaryna habarlaý tártibin jáne derekter bazasyn qalyptastyrý erejelerin bekitý», – delingen Qarjy ministrliginiń buiryq jobasynda.
Jobany ázirleýshilerdiń aitýynsha, biryńǵai baza men ortaq erejeler engizý shetelden qarjylandyrý alatyn tulǵalar týraly aqparattyń ashyqtyǵyn arttyrady. Bul óz kezeginde málimetterdi júieleýge, quqyqtyq aiqyndyq pen qarjy ainalymynyń ashyqtyǵyn qamtamasyz etýge, kóleńkeli ekonomikanyń táýekelderin tómendetýge jáne ulttyq qaýipsizdikti nyǵaitýǵa múmkindik beredi.
Buiryq jobasy 2026 jyldyń 1 qańtarynda kúshine enetin jańa Salyq kodeksi aiasynda daiyndalǵan.
Aita keteiik, Qazaqstanda 2022 jyldan bastap sheteldik kózderden aqsha nemese ózge de múlik alǵan tulǵalardyń tizimi jariialanyp keledi. Endi Qarjy ministrliginiń jobasyna sáikes, mundai azamattar týraly biryńǵai derekter bazasy jasaqtalmaq. Bul baza ashyq túrde jariialana ma, ázirge belgisiz.
