"Bolashaq" baǵdarlamasynyń stipendiaty shart talaptaryn oryndamai, Qazaqstanda belgilengen 5 jyldyq eńbekti ótemegeni úshin stipendiiadan aiyryldy jáne onyń oqýyna jumsalǵan memlekettik shyǵyndy óteýge mindetteldi. Stipendiat bul sheshimmen kelispei, sotqa júgindi, dep habarlaidy Dalanews.kz.
Astana sotynyń dereginshe, 2013 jyly 25 jeltoqsanda azamat S-ǵa AQSh-taǵy Boston University ýniversitetinde magistratýra baǵdarlamasy boiynsha oqý úshin "Bolashaq" halyqaralyq stipendiiasy taǵaiyndalǵan. Keiin qazaqstandyq magistr dárejesin alý úshin bilim alǵan. Oqýdy aiaqtaǵan soń S-ǵa eńbek óteýdi keiinge qaldyrýǵa ruqsat berildi, sebebi ol taǵylymdamadan ótýge ketken.
Taǵylymdamadan keiin talapker jeke uiymdarda jumys istegen. Qazir ol JShS-de ekonomist qyzmetin atqarady. Jumys kestesi ikemdi, qashyqtan jumys isteidi. Alaida ol sońǵy eki jyldan beri Qazaqstan aýmaǵynda turmaidy. UQK Shekara qyzmetiniń málimetinshe, azamat S. 2023 jylǵy 1 mamyrda elden shyǵyp ketken jáne sodan beri oralmaǵan.
"S-ǵa Qazaqstan aýmaǵynda eńbek óteýdi bastaý qajettigi jóninde birneshe ret eskertý hattar jiberilgen. Komissiianyń sheshimimen S. "Bolashaq" halyqaralyq stipendiiasynan aiyrylyp, eńbek óteý jónindegi kelisimshart mindettemelerin oryndamaǵany úshin memleket jumsaǵan shyǵyndy óteý mindeti júkteldi", – dep habarlady sot.
Bul sheshimge kelispegen azamat S. QR Ǵylym jáne joǵary bilim ministrligin sotqa berip, ony "Bolashaq" stipendiiasynan aiyrý týraly respýblikalyq komissiianyń sheshimin zańsyz dep tanýdy jáne kúshin joiýdy talap etti. Alaida 2025 jylǵy 1 sáýirde Astana soty talap aryzdy qanaǵattandyrýdan bas tartty.
Sottyń paiymynsha, talapker Qazaqstan aýmaǵynda mindetti eńbek óteý shartyn oryndamaǵan.
"Kelisimshart talaptaryna sáikes, stipendiat oqýyn tolyq aiaqtap, diplom alǵan kúnnen bastap 15 kúntizbelik kún ishinde Qazaqstanǵa oralýǵa, elge kirgeni jónindegi pasporttaǵy belgi kóshirmesin usynýǵa jáne alǵan mamandyǵy boiynsha keminde bes jyl úzdiksiz eńbek etýge mindetti", – dep túsindirdi sot.
Sondai-aq, kelisimshart pen baǵdarlama erejelerinde eńbek óteýdi qashyqtan oryndaý múmkindigi qarastyrylmaǵany atap ótildi.
Sot sheshimi zańdy kúshine endi.
