"بولاشاق" باعدارلاماسىنىڭ ستيپەندياتى شارت تالاپتارىن ورىنداماي، قازاقستاندا بەلگىلەنگەن 5 جىلدىق ەڭبەكتى وتەمەگەنى ءۇشىن ستيپەنديادان ايىرىلدى جانە ونىڭ وقۋىنا جۇمسالعان مەملەكەتتىك شىعىندى وتەۋگە مىندەتتەلدى. ستيپەنديات بۇل شەشىممەن كەلىسپەي، سوتقا جۇگىندى، دەپ حابارلايدى Dalanews.kz.
استانا سوتىنىڭ دەرەگىنشە، 2013 جىلى 25 جەلتوقساندا ازامات س-عا اقش-تاعى Boston University ۋنيۆەرسيتەتىندە ماگيستراتۋرا باعدارلاماسى بويىنشا وقۋ ءۇشىن "بولاشاق" حالىقارالىق ستيپەندياسى تاعايىندالعان. كەيىن قازاقستاندىق ماگيستر دارەجەسىن الۋ ءۇشىن ءبىلىم العان. وقۋدى اياقتاعان سوڭ س-عا ەڭبەك وتەۋدى كەيىنگە قالدىرۋعا رۇقسات بەرىلدى، سەبەبى ول تاعىلىمدامادان وتۋگە كەتكەن.
تاعىلىمدامادان كەيىن تالاپكەر جەكە ۇيىمداردا جۇمىس ىستەگەن. ءقازىر ول جشس-دە ەكونوميست قىزمەتىن اتقارادى. جۇمىس كەستەسى يكەمدى، قاشىقتان جۇمىس ىستەيدى. الايدا ول سوڭعى ەكى جىلدان بەرى قازاقستان اۋماعىندا تۇرمايدى. ۇقك شەكارا قىزمەتىنىڭ مالىمەتىنشە، ازامات س. 2023 جىلعى 1 مامىردا ەلدەن شىعىپ كەتكەن جانە سودان بەرى ورالماعان.
"س-عا قازاقستان اۋماعىندا ەڭبەك وتەۋدى باستاۋ قاجەتتىگى جونىندە بىرنەشە رەت ەسكەرتۋ حاتتار جىبەرىلگەن. كوميسسيانىڭ شەشىمىمەن س. "بولاشاق" حالىقارالىق ستيپەندياسىنان ايىرىلىپ، ەڭبەك وتەۋ جونىندەگى كەلىسىمشارت مىندەتتەمەلەرىن ورىنداماعانى ءۇشىن مەملەكەت جۇمساعان شىعىندى وتەۋ مىندەتى جۇكتەلدى"، – دەپ حابارلادى سوت.
بۇل شەشىمگە كەلىسپەگەن ازامات س. ق ر عىلىم جانە جوعارى ءبىلىم مينيسترلىگىن سوتقا بەرىپ، ونى "بولاشاق" ستيپەندياسىنان ايىرۋ تۋرالى رەسپۋبليكالىق كوميسسيانىڭ شەشىمىن زاڭسىز دەپ تانۋدى جانە كۇشىن جويۋدى تالاپ ەتتى. الايدا 2025 جىلعى 1 ساۋىردە استانا سوتى تالاپ ارىزدى قاناعاتتاندىرۋدان باس تارتتى.
سوتتىڭ پايىمىنشا، تالاپكەر قازاقستان اۋماعىندا مىندەتتى ەڭبەك وتەۋ شارتىن ورىنداماعان.
"كەلىسىمشارت تالاپتارىنا سايكەس، ستيپەنديات وقۋىن تولىق اياقتاپ، ديپلوم العان كۇننەن باستاپ 15 كۇنتىزبەلىك كۇن ىشىندە قازاقستانعا ورالۋعا، ەلگە كىرگەنى جونىندەگى پاسپورتتاعى بەلگى كوشىرمەسىن ۇسىنۋعا جانە العان ماماندىعى بويىنشا كەمىندە بەس جىل ۇزدىكسىز ەڭبەك ەتۋگە مىندەتتى"، – دەپ ءتۇسىندىردى سوت.
سونداي-اق، كەلىسىمشارت پەن باعدارلاما ەرەجەلەرىندە ەڭبەك وتەۋدى قاشىقتان ورىنداۋ مۇمكىندىگى قاراستىرىلماعانى اتاپ ءوتىلدى.
سوت شەشىمى زاڭدى كۇشىنە ەندى.
