Álemjelide Sherzatqa, onyń ákesi men aǵasyna shabýyl jasaǵan jigitterdiń “Hýtor” atty jergilikti qylmystyq toppen bailanysy bar degen aqparat jeldei esýde. Toptyń basshysy Hasan esimdi azamat kórinedi. Kóptiń aitýy boiynsha, ol Talǵar aýdanyn úreide ustap otyr, dep habarlaidy Dalanews.kz.
@abdulla_kz_kz pabligine habarlasqan belgisiz adamnyń sózinshe, shamamen 40-50 jastaǵy Hasannyń qol astynda búkil qylmystyq top jumys isteidi. Olar qaraqshylyqpen ainalysyp, jańa biznes nysandaryn qorǵaimyz dep ýáde beretin kóredi.
"Jaqynda Sherzattyń ákesi qala ortalyǵyndaǵy narazylyq kezinde organ qyzmetkerlerinen Hasannyń bir inisin ustaýdy suraǵan bolatyn (videoǵa túsirilgen). Alaida marqumnyń ákesi jeti kúdiktiniń birin aityp otyr ma, álde bostandyqta júrgen basqa adamdardy meńzep tur ma, ázirge belgisiz",- deidi Holanews.kz agenttigi.
“Vremia” basylymynyń jazýynsha, talǵarlyq ata-analar shabýyl jasaǵan jigitter “Hýtorskie bandity” tobynyń músheleri ekenin jetkizgen. Sondai-aq boljam boiynsha topty úsh aǵaiyndy - Hasan, Aslan jáne Erjan basqaratyny habarlanady. Aita keteiik, Erjan 2017 jyly Almatyda keden qyzmetkerin óltirgeni úshin sottalyp, áli kúnge deiin túrmede jazasyn ótep jatyr.
Holanews.kz málimetine súiensek, Hasannyń ekinshi baýyry Aslan Qasymbaev Talǵar aýdany ákiminiń apparatyn basqarady.
Bul iske qatysty Almaty oblystyq politsiia departamenti Talǵarda 16 jastaǵy Sherzat Bolatty óltirdi degen kúdikpen ustalǵan jeti adamnyń uiymdasqan qylmystyq topqa esh qatysy joq ekenin jáne aqparat shyndyqqa janaspaitynyn jetkizdi.
Bul týraly Almaty oblystyq politsiia departamenti bastyǵynyń mindetin atqarýshy Serik Shalharov málimdedi.
"Uiymdasqan qylmystyq toptyń ne ekendigi týraly naqty túsinik beretin bap bar. Ol úshin uiymdasqan qylmystyq top birneshe ret qylmys jasaǵan bolýy qajet. Biraq munda bir ǵana oqiǵa. Áleýmettik jelilerden "Hýtorskiiler" týraly aqparatty da kórdik. Eger siz Talǵar aýdanynda tursańyz, keńes zamanynda osylai atalǵan "Hýtorskaia" aýdany týraly estigen shyǵarsyz. Qazir qatelespesem, "Birlik" dep atalady. Barlyq turǵyndardy osy qylmystyq toptyń múshesi boldy dep aita almaimyz. Bizde mundai qaraqshylar men toptar joq", – dedi Shalharov.
Departament basshysy sotqa deiingi tergep-tekserý kezinde aqparatty taratýǵa tyiym salatyn qylmystyq-protsestik kodekstiń babyna silteme jasap, qamaýǵa alynǵandardyń jeke basy týraly aqparat berýden bas tartty. Alaida ustalǵan jigitterdiń áleýmettik jelide aitylǵandai quqyq qorǵaý, memlekettik organdar men sotta joǵary laýazymdy qyzmet atqaratyn adamdardyń balalary emes ekenin atap ótti.
Politseiler kúdiktilerden úsh pyshaq (eki ashana pyshaǵy, bir qalta pyshaǵy) men tirkelmegen qarý tárkilegen.
Shalharovtyń aitýynsha, is "kámeletke tolmaǵan adamǵa qatysty adamdar tobynda jasalǵan kisi óltirý" baby boiynsha tergelip jatyr. Sondai-aq ol jelidegi politsiia oqiǵa ornyna tym kesh jetti degen aqparatqa túsinikteme berdi.
"Oqiǵa týraly politsiiaǵa saǵat 00:40-ta qońyraý tústi. Qyzmetkerler oqiǵa ornyna 9-10 minýtta jetti, iaǵni standartqa sai. Degenmen, ishki tekserý júrgiziledi", – dedi Serik Shalharov.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
