Áskeri qyzmet kezinde qaza tapqan Almas Kóbenovtiń otbasynyń qazirgi jaǵdaiy týraly jańa málimet aityldy. Bul jóninde qoǵam belsendisi Azamat Sársenbaev jazba jariialaǵan, dep habarlaidy dalanews.kz.
Almas Kóbenov Mańǵystaý oblysynyń Baiandy aýylynda turǵan bes balaly otbasynyń kenje uly bolǵan. Onyń eki aǵasy da buǵan deiin áskeri boryshyn ótegen.
Belsendiniń málimetinshe, marqumnyń anasy Merýert Dúisenbaeva ishek qaterli isiginiń ekinshi satysymen kúresip júr. Ol qazir himioterapiia qabyldaýda. Al ákesi Júsip Orazaliev jubaiynyń jaǵdaiyna bailanysty turaqty jumys istei almaidy.
Otbasynyń aitýynsha, Almas qaza tapqan kúni anasy onkologiialyq aýrýyna bailanysty em qabyldaýy tiis bolǵan. Alaida qaiǵyly jaǵdaidan keiin emin úi jaǵdaiynda jalǵastyrýǵa týra kelgen.
Otbasynyń úlken uly Qylmystyq-atqarý júiesinde qyzmet etedi. Al taǵy bir uly jumys isteý úshin Aqtóbe oblysyna ketken. Ata-anasy onyń týǵan jerine oralyp, Mańǵystaýdan jumys tapqanyn qalaidy.
Azamat Sársenbaevtyń jazýynsha, jergilikti atqarýshy organdar Almas Kóbenovti jerleýge bailanysty shyǵyndardy óteý maqsatynda otbasyna materialdyq kómek kórsetken.
Sonymen qatar otbasynyń qarjylyq jaǵdaiy da kúrdeli ekeni aitylady. Nesie boiynsha merzimi ótken tólemderge bailanysty olardyń bank shottary buǵattalǵan. Sol sebepti qazirgi ýaqytta kómek retinde aqsha aýdarýǵa bolatyn qoljetimdi esepshottar joq.
Belsendi qaza tapqan sarbazdardyń otbasylaryna ýáde etilgen ótemaqynyń tolyq kólemde tólenýi mańyzdy ekenin atap ótti. Onyń pikirinshe, bul Almas Kóbenovtiń otbasyna da eleýli qoldaý bolar edi.
Derekkóz: Ozgeris.info
