Qazaqstan azamattaryna baǵyttalǵan kibershabýyldarǵa qatysy bar degen kúdikpen 18 adam Ýkrainada qamaýǵa alyndy. Bul týraly Quryltai aiasyndaǵy brifingte Ishki ister ministriniń orynbasary Sanjar Ádilov málimdedi, dep habarlaidy dalanews.kz.
Vitse-ministrdiń aitýynsha, kiberqylmystyń shekarasy joq. Mundai shabýyldardyń edáýir bóligin birneshe elde qatar áreket etetin transulttyq toptar uiymdastyrady. Sondyqtan kúdiktilerdi anyqtaý men tsifrlyq dálelderdi jinaýda sheteldik quqyq qorǵaý organdarymen birlesken jumys erekshe mańyzǵa ie.
«Kibershabýyldar ártúrli elden jasalady. Sheteldik áriptesterimizben júrgizilgen jumys nátijesinde 20-dan astam ortalyq anyqtaldy. Qazir 18 adam Ýkrainada qamaýda otyr. Mundai qylmystardy kóbine transulttyq toptar jasaidy. Sondyqtan kez kelgen qaýipke daiyn bolýymyz qajet», – dedi Sanjar Ádilov.
Onyń sózinshe, árbir kibershabýyldy Qazaqstanǵa ádeii baǵyttalǵan áreket dep baǵalaýǵa bolmaidy. Sebebi alaiaq toptar bir mezette birneshe memlekettiń azamattaryn nysanaǵa alýy múmkin.
Qazaqstannyń Kompiýterlik qylmystar týraly konventsiiaǵa qosylýy da halyqaralyq yntymaqtastyqty jedeldetýge múmkindik beredi. Sonyń arqasynda otandyq quqyq qorǵaý organdary sheteldik áriptesterimen jáne internet-provaiderlermen tikelei aqparat almasa alady. Bul qylmyskerlerdiń tsifrlyq izderi joiylyp ketpei turyp, qajetti derekterdi saqtap qalýǵa kómektesedi.
