Sherzat Polattyń ólimine qatysty is boiynsha sot tergeýi aiaqtalyp, taraptardyń jaryssózi bastaldy. Memlekettik aiyptaýshy Dana Sársenbai sotta sóilegen sózinde basty aiyptalýshylardyń biri Abzal Shynasyldan jeti ret jaýap alynǵanyn atap ótti, dep habarlaidy Dalanews.kz.
Onyń ishinde kúdikti retinde bergen jaýabynda «Sherzatqa pyshaq suǵyp aldym» degen sózi bar ekenin eske saldy.
Sot otyrysy barysynda qorǵaý quqyǵy bar Jaqsykeldiniń jáne sottalýshylardyń biri Abzaldyń tóbelesten keiin pyshaǵyn jýyp jatqanyn aitqan. Bul – istegi mańyzdy epizodtardyń biri retinde tirkeldi.
Saraptama nátijesine súiensek, Sherzattyń sol jaq ókpesiniń joǵarǵy bóligindegi jaraqat onyń ólimine sebep bolǵan jáne ol densaýlyqqa aýyr ziian keltiretin jaraqat retinde baǵalanǵan.
Prokýror sarapshy Halimnazarovtyń qorytyndysyn keltirip, jaraqattyń tereńdigi 12 sm bolǵanyn, al Shynasyldan alynǵan pyshaqtyń júzi 9,5 sm ekenin aitty. Sarapshynyń pikirinshe, adamnyń terisi serpimdi bolǵandyqtan, pyshaq sabynyń túbine deiin kirip ketken. Bul – pyshaqtyń úlken kúshpen salynǵanyn kórsetedi.
Dana Sársenbai Shynasyldyń sotty shatastyrý úshin ártúrli jaýap bergenin atap ótip, onyń sózine senýge bolmaitynyn jetkizdi. Prokýrordyń aitýynsha, Sherzatqa pyshaq salǵan naqty tulǵa – Shynasyl Abzal ekeni tolyq dáleldengen. Bul jaitty eki birdei sarapshy da rastaǵan.
