Sherzat Polatty óltirý isi boiynsha ótip jatqan sot otyrysynda kútpegen jait boldy. Iske tirkelgen basty aiǵaq – kúdiktilerdiń tergeý izoliatoryndaǵy áńgimesi jazylǵan beinejazba diskisi is materialdarynan joǵalyp ketken, dep habarlaidy Dalanews.kz.
Advokattardyń aitýynsha, video jasyryn ornatylǵan kamera arqyly jazylǵan. Onda aiyptalýshylar – Nurkiias Iliias pen Abzal Shynasyl tergeýge deiingi qamaýda otyryp, Sherzattyń ólimi bolǵan túngi oqiǵalardy talqylaǵan.
Sotta jábirlenýshi taraptyń qorǵaýshylary beinejazbanyń stenogrammasyn oqyp berdi. Onda mynadai dialog jazylǵan:
- Álgi áieldiń kózi qiyq edi, baýyrym, – deidi Abzal.
- Dosym, baiqamappyn, – dep jaýap beredi Nurkiias.
- Ol ishke úńilip qarady… Al eger basqa jaqqa qarasa she? Bizdiń arttaǵy kólikterge tiip te ketpegeni qalai? Men tas laqtyrdym.
- Men de laqtyrdym.
- Bir jerine dóp tidi. Men tas alyp, olardyń biriniń artynan ekinshisi turǵanyn kórdim. Ana jaqta da kólik turǵan. Men laqtyrdym, myna jerge tidi.
- Biraq sen atqanyńdy aitpadyń ǵoi. Árine, umytqan shyǵarsyń. Aitpa.
Advokat Baǵdagúl Ájiǵalieva osy dialogqa qatysty aiyptalýshylarǵa suraq qoimaq bolǵan. Alaida olar bul sózderdi ózderi aitpaǵandaryn kesip aitty.
Jábirlenýshi tarap sottan №5825 diskini – sol áńgimeniń túpnusqa beinejazbasyn – qaita qarap shyǵýdy surady. Alaida sot barysynda bul disk is materialdarynan tabylmady.
