16 jastaǵy Sherzat Bolattyń ólimine bailanysty sotta jantúrshigerlik kadrlar kórsetildi, dep habarlaidy Dalanews.kz.
Qazirgi tańda sottalýshylardyń biri Darhan Áskentaidan jaýap alynyp jatyr. Jaýap alý barysynda qaiǵyly oqiǵa bolǵan túni kýágerler túsirip alǵan video kórsetildi.
Videoda marqum Nurqanat Ǵaiypbaev "jedel járdem shaqyryńdar" dep birneshe ret aiǵailap, al Sherzattyń anasy qasynda jan daýysymen "qoi dedim ǵoi" dep aiǵailap jatady.
Videodan kúdiktilerdiń biri Sherzatty ne Nurqanatty dýbinkaǵa ia myltyqqa uqsas zatpen uryp jatqanyn baiqaýǵa bolady.
Sonymen qatar, prokýrordyń sózinshe, sol sátte aiyptalýshy Belqojaev jerde jatqan Sherzatty teýip ketedi.
"Osy sátte Belqojaev, Shynasyl, Iliasov jáne Sákiev Ǵaiypbaevty bólek, sol jaqqa qarai súirep alyp ketken. Shynasyl men Sákiev pyshaq jaraqattaryn keltirgen. Bul qujattarmen anyqtaldy", - deidi prokýror.
Video Dalanews.kz-tiń Instagram-paraqshasynda jariialandy.
Buǵan deiin tanymal advokat Djohar Ótebekov Sherzat isindegi shikilikterdi jaiyp salǵan bolatyn. Ótebekov Sherzat mert bolǵan oqiǵa ornynda 15 adam bolǵanyn atap ótti.
"Onyń 13-i tergeýden ótti. 11-in qamaýǵa aldy. Sot aldynda tek toǵyzy jaýap berip jatyr. Al Sherzatty óltirdi dep tek bir adam kúdikke ilingen! Qalǵany kórshilerdiń uiqysyn buzypty-mys. Olardy buzaqylyq babymen sottamaq. Biz kórgen nárse toptasyp adam óltirý bolmasa, ne bolǵany? Politsiia men prokýratýra ne úshin "hýtorlyqtardy" kinásiz dep sanaidy?
Sýdia protsesti zań turǵysynan jaqsy júrgizip otyr. Biraq sýdia óz-ózinen politseiler men prokýrorlar kinásiz dep tanyǵan adamdardy kisi óltirgeni úshin sottai almaidy", - deidi advokat.
Djohar Ótebekov buzaqylyq babymen sottalǵandar bir jyldan keiin-aq bostandyqqa shartty merzimmen shyǵyp ketetinin aitty.
Al búgin Sherzat isindegi sýdia blogerler men halyqqa eskertý jasady.
Sýdia Erjan Januzaqovtyń aitýynsha, protsesti talqylaýǵa, tergeý men sottyń jumysyna baǵa berýge bolmaidy.
"Áleýmettik jelilerde blogerler men sot protsesine eshqandai qatysy joq basqa azamattar jeke pikir bildirip, tergeý áreketteri men sot protsesiniń barysyna sýbektivti baǵa berip jatyr. Qazaqstan Respýblikasy Konstitýtsiiasynyń 75-babynyń 1-tarmaǵyna sáikes Qazaqstan Respýblikasynda sot tóreligin tek sot júzege asyratynyn eske salamyz. Sottyń sot tóreligin iske asyrý jónindegi qyzmetine aralasýǵa jol berilmeidi jáne zań boiynsha jaýapkershilikke ákep soǵady", - dedi sýdia.
Ol sot protsesi aiaqtalǵanǵa deiin, úkim shyǵarylǵanǵa jáne zańdy kúshine engenge deiin sot protsesine pikir bildirý, quqyqtyq baǵa berý zańsyz ekenin málimdedi.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
