Jetisý oblysynyń Qylmystyq ister jónindegi mamandandyrylǵan aýdanaralyq sotynda Sherzat Polatty óltirý deregi boiynsha kezekti sot otyrysy ótti. Bul joly sot 2024 jylǵy 3-ten 4 qazanǵa qaraǵan túni aiyptalýshylardyń kólikte sóilesken sátindegi aýdiojazbamen tanysty, dep habarlaidy Dalanews.kz.
Jábirlenýshi taraptyń qorǵaýshylary sotta jazbadaǵy eń eleýli tustardy atap kórsetti. Aýdiojazbada mynadai jaittar anyqtalǵan:
Aiyptalýshy Nurqiias Iliiasov oqiǵa kezinde Sherzattyń anasyn ózi toqtatyp, sol sátte onyń ulyna ólimshi jaraqat salǵanyn aitqan;
Aiyptalýshylar shabýyl kezinde qoldanylǵan qarýdyń qaidan shyqqanyn ózara talqylaǵan;
Qylmysqa qatysqandar elden qashý joldaryn qarastyrǵan – olardyń áńgimesinde Grýziia men Reseige ketý nusqalary aitylǵan;
Is figýranttarynyń biri Azamat Toqtaýbaev bóten telefondy alǵanyn moiyndap, ony dúken mańynan taýyp alǵanyn jáne keiin dostaryna qaitarmaq bolǵanyn aitqan.
Sot otyrysynda jazbada estilgen daýystardyń aiyptalýshylarǵa tiesili ekeni rastaldy – olar bul faktini moiyndaǵan.
Qylmystyq is boiynsha tyńdaýlar jalǵasýda.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
