Qazaqstandyq belgili advokat Johar Ótebekov Sherzat Bolattyń qazasyna qatysty shyǵarylǵan úkim qazaqstandyqtardyń kóńilinen shyǵa ma degenge kúmán keltirip otyr, dep habarlaidy Dalanews.kz.
Ol bul týraly «GiperBorei» YouTube-arnasyna bergen suhbatynda aityp, kóp azamattar bul iste aiyptalýshylardyń barlyǵy adam óltirý babymen sottalyp jatyr dep oilaitynyn túsindirdi.
Advokattyń sózinshe, Sherzat Bolattyń ólimine qatysty is boiynsha toǵyz adam jaýapqa tartylyp jatyr. Alaida olardyń barlyǵy kisi óltirý babymen aiyptalmaǵan. Máselen, kámeletke tolmaǵan Dýman Ysqaq qylmys týraly habarlamaǵany úshin aiyptalyp otyr jáne onyń sottalmai qalýy múmkin.
— Jábirlenýshi tarap ony keshirip, bosatýdy surap otyr, — dedi Ótebekov.
Qoǵamdyq pikirdiń qalyptasýyna áleýmettik jelilerde jariialanǵan beinejazba qatty áser etken. Sonyń saldarynan jurt sottalýshylardyń barlyǵyn birdei kisi óltirýshi retinde qabyldaidy. Alaida Ótebekov bul túsiniktiń durys emestigin aityp ótti: aiyptalýshylardyń ishinde tek Abzal Shynasyl ǵana «kisi óltirý» babymen aiyptalyp jatyr. Al Ravil Sakiev ekeýi Sherzattyń aǵasy Nurǵanat Ǵaiypbaevqa «qastandyq jasaý» baby boiynsha jaýap beredi.
Al qalǵan aiyptalýshylarǵa prokýratýra qarý qoldana otyryp buzaqylyq jasady degen aiyp taqqan. Bul bap boiynsha eń joǵarǵy jaza — jeti jyl.
Advokat sonymen qatar oqiǵa ornynda bolǵan eki qyzǵa qatysty da pikir bildirdi. Onyń aitýynsha, olar kináli dep tanylmaǵan jáne sot bul sheshimdi ózgerte almaidy.
