Sherzat Bolattyń ólimine qatysty ótip jatqan sot otyrysynda aiyptalýshy Didar Qalihmettiń advokaty jábirlenýshi tarap ókilderine qylmystyq is qozǵaýdy surady. Advokattyń aitýynsha, jábirlenýshi Qarjaýbai Nurymov, Aiman Bishembaeva jáne Nurai Kadirova sotta qarama-qaishy jaýap bergen, dep habarlaidy Dalanews.kz.
Qorǵaýshy tarap ókili sotqa deiingi tergeý kezinde jáne sot protsesinde aitylǵan jaýaptardyń arasynda alshaqtyq baryn atap ótti. Onyń sózinshe, jábirlenýshilerdiń jaýaby turaqty emes, únemi ózgerip otyrǵan.
"Bul tulǵalar tergeý men sotta ártúrli málimet berip otyr. Qylmystyq kodekstiń 420-babyna sáikes, jalǵan jaýap bergender qylmystyq jaýapkershilikke tartylýy tiis. Olar aiyptalýshyǵa qarsy barynsha aýyr júk artqysy keldi. Sondyqtan Nurymov, Bishembaeva men Kadirovaǵa qatysty jeke qaýly shyǵaryp, materialdardy ýákiletti organǵa joldaýdy suraimyn", – dedi advokat.
Sonymen qatar, sot tergeýi barysynda jábirlenýshi taraptyń zańdy ókili Meiirman Shekeevtiń ózi de sýyq qarýdy oqiǵa ornyna alyp kelgen tulǵa jábirlenýshilerdiń biri ekenin moiyndaǵan. Videojazbada Qarjaýbai Nurymovtyń dúkennen birinshi bolyp pyshaq alyp shyqqany anyq kórinedi.
Osyǵan bailanysty qorǵaýshy tarap Sherzat Polat, Nurqanat Ǵaiyppaev jáne Qarjaýbai Nurymovqa qatysty QR QK-niń 293-babynyń 3-bóligi (Buzaqylyq) boiynsha jeke qaýly shyǵaryp, Almaty oblystyq prokýratýrasyna protsessýaldyq sheshim qabyldaý úshin joldaýdy surady.
