«Buǵan deıin ondaı toptardyń ustalǵany jaıly estigen bolarsyzdar. Qazir tergeý sharalary júrip jatyr. Shamamen, jeltoqsan aıynda bárin aıtyp beremiz. Kim? Ne? Qalaı boldy? Dál qazir tergeý júrip jatqandyqtan eshteńe aıta almaımyn. Olar shekaradaǵy jaǵdaıdy ýshyqtyryp, eldi dúrliktirip otyr. Aqparattyq shabýyl jasaýdy da úırendi», - deıdi D.Erǵojın.
Aıta keteıik, búginde Qytaıdan taýar tasymaldap júrgen qazaqstandyq kásipkerler rásimdeý sharalaryn óz shekarasynda emes, qyrǵyz jerinde jasap júr. Sebebi, ol jaqta salyqtyń mólsheri az deıdi. Al Qyrǵystan Eýrazıalyq ekonomıkalyq odaqqa múshe bolǵannan keıin ol taýardy Qazaqstanǵa emin-erkin alyp kelýge bolady. Kásipkerler Memlekettik kirister komıtetin salyqty tym joǵary qoıady dep kinálap otyr. Jaqynda osy másele «Atameken» ulttyq kásipkerler odaǵynda keńinen qaralǵan bolatyn. Senatta ótken búgingi kezdesýde komıtet basshysy bul másele jóninde naqty ári jan-jaqty jaýap berdi.
