Aqtóbe oblysynyń ákimi Ashat Shaharov kepilge alynǵan turǵyndardyń qaza tabýyna qatysty málimdeme jasady, dep habarlaidy Dalanews.kz.
Bul týraly ákim áleýmettik jelidegi paraqshasynda jazdy.
"Oblys ortalyǵyndaǵy qylmyskerdiń túndegi áreketi qoǵamda jan-jaqty talqylanýda. Bul jaǵdaiǵa qatysty qylmystyq is qozǵalyp, tergeý amaldary júrgizilip jatqanyn aitqym keledi. Quqyqtyq baǵasyn quzyrly organdar beretin bolady. Qazirgi ýaqytta zardap shekken jábirlenýshige jan-jaqty meditsinalyq jáne psihologiialyq qoldaý kórsetilip jatyr. Al marqum bolǵan azamattardyń jerleý rásimine qajetti kómekter uiymdastyrylady. Osy rette kúdiktini ustaýda kirpik ilmei, kásibilik tanytqan politsiia qyzmetkerlerine alǵysymdy bildiremin. Qaýipsizdik sharalary - baqylaýymda", deidi ákim.
Eske salaiyq,14 qańtarǵa qaraǵan túni Aqtóbede belgisiz bireý adamdardy kepilge aldy. Úidegi úsh adam zardap shekti, onyń ekeýi qaza tapty.
13 qańtar kúni saǵat 20:00 shamasynda Jedel basqarý ortalyǵyna Aqtóbe qalasyndaǵy jeke turǵyn úiden kepilge alý týraly habarlama kelip túsken.
Jedel-tergeý toby men arnaiy bólimsheler oqiǵa ornyna dereý jetti. Jedel qyzmetter kelgen boida, kúdiktimen buryn tanys bolǵan, bir áieldiń kepilge alynǵany belgili boldy.
Bul rette kúdikti qandai da bir talaptar qoiǵan joq. Úsh saǵattyq kelissózderden keiin jáne kúdikti kepilge alynǵan adamdy bosatý týraly talaptardy oryndaýdan bas tartqannan soń, shabýyl jasaý týraly sheshim qabyldanǵan.
Arnaiy operatsiia nátijesinde kúdikti ustalyp, kepilge alynǵan áiel bosatyldy.
Oqiǵa bolǵan jerdi zerdeleý barysynda jertólede pyshaq jaraqattarymen egde jastaǵy ata-anasy tabyldy.
Ókinishke qarai, zardap shekkenderdiń biri tasymaldaý kezinde, al ekinshisi aýrýhanada kóz jumdy. Úshinshi jábirlenýshige dárigerler barlyq qajetti meditsinalyq kómek kórsetip jatyr.
"Politsiia departamenti qaza tapqandardyń týystary men jaqyndaryna kóńil aitady. Kináli adam zańnyń barlyq qatańdyǵymen jazalanatyn bolady", deidi politseiler.
Bul fakti boiynsha qylmystyq is qozǵaldy. Kúdikti ýaqytsha ustaý izoliatoryna qamaldy.
