Shámil Ábiltai Nazarbaevqa arnaǵan «Elbasy» kúiin órtep jiberdi
– «Elbasy» degen kúiińiz bar edi... Osy kúiińizdiń taǵdyry qalai bolyp jatyr?
– Boldy. Biraq qazir men ony órtep jiberdim.
– Nege?
– Nazarbaev taqta turǵanda ketem dep oilamady. Patsha elmen birge bola ma degen úmit boldy, bizde. Mynadai jaǵdaidan keiin kúidiń kiesine qalmaiyn dep órtep jiberdim. Kúi – qazaqtyń boitumary. Buryn Gete men Bethoven de Nopaleonǵa arnap shyǵarma jazǵan. Keiin qatty renjip, ókingen desedi. Meniń de kóńil-kúiim osyndai.
– Notasyn órtedińiz ba?
– Notasyn, bárin-bárin. Tipti oiymnan shyǵaryp tastadym. Ondai kúi joq qazir. Qazirgi ýaqytta sherlimin. Bárimiz sherlimiz
– Nazarbaev týraly áleýmettik jelide, baspasóz betterinde pikir bildirdińiz be?
– Men sózdiń adamy emespin!
– Qasym-Jomart Toqaevqa kúi arnamadyńyz ba? Qańtar qyrǵyny qalai áser etti?
– 7 qańtar kúni QR Prezidenti Qasym-Jomart Toqaevtyń halyqqa joldaǵan úndeýi meni de jigerlendirip, dombyram sóilep ketti. Sodan «Qańtar qyrǵyny» degen kúi týdy. Shynymdy aitaiyn, meni ony jáidan-jái shyǵara salǵan joqpyn. Toqaev halyqqa úndeý joldamaǵanda osy kúi shyqpaityn edi.
Týyndy keshegi «Qańtar qyrǵynyna» bailanysty. Jambyldyń «Leningradtyq órenderim» óleńi siiaqty. «Qańtar qaharmany» degen kúiim ólgenderge taǵzym, tiri qalǵandarǵa rýh berý úshin shyǵaryldy. Menen «Shámil, neshe kúiiń bar?» dese bir ǵana kúiim bar deýim múmkin. Ol – «Qańtar qaharmany». Qasym-Jomarttyń atasyna «Toqai taǵdyry» degen kúimen qulpytas qoidym. 30-jyldary asharshylyq qurbany bolǵan ǵoi. Onyń molasy da joq. Ashtan ólgen 4 mln adamnyń biri.
Ol kúidiń jelisimen bir aqyn «Toqai taǵdyry» degen poema jazdy. Poemada
«Jańa kórgen jandaimyn tańdy myna,
Tasyttyń-aý tebirentip qandy qumar,
Qurbandardyń rýhyna kúimen taǵzym,
Bul ashtyqqa arnalǵan máńgi mura»,- degen joldary bar.
Toqaev prezident bolmai turǵanda «Áke týraly tolǵanys» degen kitabyn oqyǵanmyn. Sol boiynsha týǵan kúi edi. Áitpese Toqaevpen kezdesken adam emespin. Kezdesý de shart emes. Elge jaqsylyq jasap, ádildikti ornatsa boldy. Otyz jyl oirannyń qurbany boldyq. Endi esimizdi jiyp kele jatyrmyz. Temirqazyǵymyz aiqyndalyp, Qazaqstan baqytty el bolatynyna senip otyrmyn, ainalaiyn.
– Qazirgi prezidenttiń qasynan tabylsam deisiz be, sonda?
– Buryn Nazarbaevtyń yqpalynan shyǵa almai júr edi, erligi bir kúnde áigilendi. Minezi bar. Shyńǵyshannyń urpaǵy ekenin kórsetti. Bul – ekinshi Shyńǵyshan. «Bilimdi myńdy jyǵady» degen osy. Ultymyzdyń qazirgi súienishi - osy kisi. Máshhúr Júsip aitqan 30 jyldan keiingi kelgen jany taza adam osy - Toqaev dep otyrmyn. Meniń aitqanym shyndyq. Dos bolsań da, qas bolsań da qazaqtyń bárine birdei qaraimyn. Men kúiimniń kompasy qalai júredi, sol yrǵaqpen ómir súrip kele jatqan adammyn.
– Jańa Qazaqstannan ne kútesiz?
– Jańa saiasatqa jańa saiasi reforma jasaý kerek, Konstitýtsiiany qaita jasaý kerek. Parlamentti taratý kerek. «Nur Otan» partiiasyn joiý kerek. Sonda ǵana Qasym-Jomart Kemeluly naǵyz batyr bolyp shyǵady. Burynǵy jolmen júre bersek, eshteńe de ózgermeidi. Aldaǵy kúnderden tek jaqsylyq qana kútemin. Babalarymyz armandaǵan qoi ústine boztorǵai jumyrtqalaǵan zamanǵa jetemiz dep senip otyrmyn.
Pikirlesken: Oljas Ábiluly
