Atyraýda NCOC munai-gaz kompaniiasynyń bólim bastyǵy óli tabyldy,- dep habarlaidy Dalanews.kz.
"Aq Jaiyq" basylymy málimetinshe, 29 sáýirde Atyraýda óz úiinen 45 jastaǵy Bibigúl Shpanova óli tabylǵan. Onyń munai-gaz salasynda 20 jyldan asa tájiribesi bar, NCOC kompaniiasynyń bólim basshysy da bolǵan. Politsiia málimetteri boiynsha áieldiń denesinde pyshaq jaraqattary anyqtalǵan, al páterindegi seif ashylǵan.
Marqumnyń týystary Adam quqyqtary biýrosyna júginip, jan-jaqty tergeý júrgizýdi talap etti. Olar qylmystyń sebebi marqumnyń kásibi qyzmetine bailanysty bolýy múmkin dep esepteidi.
Politsiia kúdiktini, iaǵni 1987 jyly týǵan er adamdy ustaǵanyn habarlady. Ol ýaqytsha ustaý izoliatoryna qamaldy. "Adam óltirý" baby (QR Qylmystyq kodeksiniń 99-babynyń 2-bóligi) boiynsha qylmystyq is qozǵaldy. Zattai aiǵaqtar tárkilenip, tergeý júrgizilip jatyr.
Adam quqyqtary biýrosy Facebook-te jariialaǵan habarlamaǵa súiensek, Shpanova iri ulttyq jobalarǵa, sonyń ishinde Qashaǵan ken ornyn igerýge bailanysty jobalarǵa qatysqany aitylǵan.
"Sotaldy tergeý barysy Atyraý oblysy Politsiia departamenti basshylyǵynyń baqylaýynda. Áleýmettik jeli qoldanýshylaryn tek resmi derekkózderge súienýge, jalǵan aqparat taratýdan aýlaq bolýǵa shaqyramyz", – dedi Politsiia departamentiniń baspasóz qyzmeti ókili.
