اتىراۋدا NCOC مۇناي-گاز كومپانياسىنىڭ ءبولىم باستىعى ءولى تابىلدى،- دەپ حابارلايدى Dalanews.kz.
"اق جايىق" باسىلىمى مالىمەتىنشە، 29 ساۋىردە اتىراۋدا ءوز ۇيىنەن 45 جاستاعى بيبىگۇل شپانوۆا ءولى تابىلعان. ونىڭ مۇناي-گاز سالاسىندا 20 جىلدان اسا تاجىريبەسى بار، NCOC كومپانياسىنىڭ ءبولىم باسشىسى دا بولعان. پوليسيا مالىمەتتەرى بويىنشا ايەلدىڭ دەنەسىندە پىشاق جاراقاتتارى انىقتالعان، ال پاتەرىندەگى سەيف اشىلعان.
مارقۇمنىڭ تۋىستارى ادام قۇقىقتارى بيۋروسىنا جۇگىنىپ، جان-جاقتى تەرگەۋ جۇرگىزۋدى تالاپ ەتتى. ولار قىلمىستىڭ سەبەبى مارقۇمنىڭ كاسىبي قىزمەتىنە بايلانىستى بولۋى مۇمكىن دەپ ەسەپتەيدى.
پوليسيا كۇدىكتىنى، ياعني 1987 جىلى تۋعان ەر ادامدى ۇستاعانىن حابارلادى. ول ۋاقىتشا ۇستاۋ يزولياتورىنا قامالدى. "ادام ءولتىرۋ" بابى (ق ر قىلمىستىق كودەكسىنىڭ 99-بابىنىڭ 2-بولىگى) بويىنشا قىلمىستىق ءىس قوزعالدى. زاتتاي ايعاقتار تاركىلەنىپ، تەرگەۋ جۇرگىزىلىپ جاتىر.
ادام قۇقىقتارى بيۋروسى Facebook-تە جاريالاعان حابارلاماعا سۇيەنسەك، شپانوۆا ءىرى ۇلتتىق جوبالارعا، سونىڭ ىشىندە قاشاعان كەن ورنىن يگەرۋگە بايلانىستى جوبالارعا قاتىسقانى ايتىلعان.
"سوتالدى تەرگەۋ بارىسى اتىراۋ وبلىسى پوليسيا دەپارتامەنتى باسشىلىعىنىڭ باقىلاۋىندا. الەۋمەتتىك جەلى قولدانۋشىلارىن تەك رەسمي دەرەككوزدەرگە سۇيەنۋگە، جالعان اقپارات تاراتۋدان اۋلاق بولۋعا شاقىرامىز"، – دەدى پوليسيا دەپارتامەنتىنىڭ باسپا ءسوز قىزمەتى وكىلى.
