Kókshetaýda Ulybritaniiaǵa jumysqa ornalastyrýdy ýáde etip, ondaǵan adamdy aldady degen kúdikpen áielge qatysty qylmystyq is tergelip jatyr, dep habarlaidy dalanews.kz.
Politsiianyń málimetinshe, sotqa deiingi tergeý Qylmystyq kodekstiń 190-babynyń 4-bóligi («Alaiaqtyq») boiynsha júrgizilýde.
Tergeý nusqasyna sáikes, kúdikti 2023 jyldan 2026 jyldyń qańtaryna deiin áleýmettik jeliler arqyly azamattarǵa Ulybritaniiaǵa jumysqa ornalastyrý qyzmetin usynǵan. Ol viza rásimdeý, meditsinalyq saqtandyrý, biometriialyq rásimderden ótkizý jáne basqa da qujattardy daiyndaý syltaýymen azamattardan aqsha alǵanymen, ýáde etilgen qyzmetterdi kórsetpegen.
Qazirgi ýaqytta qylmystyq is boiynsha 93 adam jábirlenýshi dep tanylǵan. Aldyn ala esep boiynsha keltirilgen shyǵyn kólemi shamamen 60 mln teńgeni quraidy. Aqsha qolma-qol da, bank aýdarymdary arqyly da berilgen.
Tergeý barysynda qajetti tergeý áreketteri júrgizilip, kúdikti jaýap alynǵan. Oǵan qatysty úiqamaq túrindegi bultartpaý sharasy tańdaldy.
Qazirgi ýaqytta politsiia oqiǵanyń barlyq mán-jaiyn anyqtap, basqa da yqtimal jábirlenýshilerdi izdestirip jatyr.
Osyǵan bailanysty quqyq qorǵaý organdary azamattardy shetelge jumysqa ornalasý kezinde saq bolýǵa, deldaldardyń qyzmetin muqiiat tekserýge jáne usynylatyn qyzmettiń zańdylyǵyna kóz jetkizbei aqsha aýdarmaýǵa shaqyrdy.
