Reseidiń Týva Respýblikasynda iz-túzsiz joǵalǵan eki mektep oqýshysyn izdeý jumystary táýlik boiy jalǵasyp jatyr. Quqyq qorǵaý organdary, qutqarýshylar, súńgýirler, eriktiler, sondai-aq qyzdardyń týystary men dostary olardyń sońǵy ret bolǵan jeri sanalatyn Enisei ózeniniń jaǵasyn muqiiat tekserýde, dep habarlaidy dalanews.kz.
Joǵalǵandardyń biri – Ailananyń anasy Mochýrgai Shombýn jýrnalisterge izdeý jumystarynyń barysy týraly aityp, ózin alańdatqan jumbaq telefon qońyraýy jóninde málimdedi.
Qyzdar eshkimge eskertpesten ketken
Ailana men Amina 1 shilde kúni keshki saǵat 18:00 shamasynda serýendeýge shyǵyp, sodan beri úilerine oralmaǵan. Týystary olarǵa birneshe ret habarlasqanymen, qyzdar telefon kótermegen. Osydan keiin otbasy politsiiaǵa júginip, izdeý jumystary bastalǵan.
Anasynyń aitýynsha, Ailana buryn-sońdy eshqashan úiden eskertýsiz ketpegen.
"Qyzym qaida baratynyn mindetti túrde aityp ketetin. Qońyraýlarǵa da árdaiym jaýap beretin. Sol kúni biz baqshada júrgende, qurbysymen sóilesip, úiden shyǵyp ketipti. Ol óte úikúshik bala, tipti kúndizdiń ózinde jalǵyz kóp shyqpaityn", – deidi anasy.
Qazir izdeýge eriktiler, týystar, áriptester men tanystary túgel jumyldyrylǵan.
"Telefonnan qyzdardyń aiqaiy estilgen"
Anasynyń sózinshe, ózen jaǵasynan qyzdardyń uialy telefondary men qyzynyń bir aiaq kiimi tabylǵannan keiin basqa eshqandai zat kezdespegen. Qyzdardyń ózderi de bailanysqa shyqpaǵan.
Alaida keiin kútpegen jerden beitanys qyz telefon soǵyp, kúmándi jaitty jetkizgen.
"Keshe keshke bir qyz habarlasty. Ol kúdikti bolýy múmkin tanysyn tapqanyn aitty. Telefonmen sóilesken kezde arǵy jaqtan qyzdardyń aiqailaǵan daýysy estilgen eken. Biraq álgi er adam onyń óz ápkeleriniń daýysy ekenin aitqan. Alaida onyń ápkeleri joq ekenin bári biledi", – deidi Ailananyń anasy.
Eń jumbaq jait – telefondardyń túnde paida bolýy
Joǵalǵan qyzdardyń biriniń týysy Rozaliia Mongýshtyń aitýynsha, eń kúmándi jaǵdailardyń biri – uialy telefondardyń tabylý ýaqyty.
Onyń sózinshe, týystary qyzdardy izdep, Enisei jaǵasyna alǵash kelgen kezde eshqandai telefon bolmaǵan. Olar tek túnde ǵana tabylǵan.
"Kesh boiy qyzdardyń telefondary shaqyrylyp turdy. Biraq túngi saǵat úsh shamasynda politsiiadan "habarlasyńdar" degen SMS jiberilgennen keiin birden óship qaldy. Keiin telefondardy tapqanda olardyń qosýly ári qýaty tolyq bolǵan. Demek, bireý ádeii telefondardy óshirip, keiin qaita qosqan siiaqty. Bul bizdi qatty alańdatyp otyr", – deidi áiel.
Beinekamera sońǵy sátterin túsirip qalǵan
Baqylaý kameralarynyń jazbasynda Ailana men Aminanyń ashyq tústi fýtbolka men kógildir sholaq shalbar kiip, kóshemen jai ǵana ketip bara jatqany kórinedi. Osydan keiin olardy eshkim kórmegen.
Týystarynyń aitýynsha, qyzdar buryn qaladaǵy mektepterdiń biriniń mańynda serýendegendi unatatyn. Alaida 1 shilde kúni dál sol jerde bolǵan-bolmaǵany ázirge belgisiz.
"Ózenge óz erikterimen barýy ekitalai"
Jaqyndarynyń pikirinshe, jasóspirimderdiń Eniseidiń qaýipti jaǵalaýyna óz erikterimen barǵanyna sený qiyn. Óitkeni olardyń eshqaisysy júze almaǵan.
Qazirgi ýaqytta quqyq qorǵaý organdary men qutqarý qyzmetteri qyzdardy kúndiz-túni izdeýdi jalǵastyryp jatyr. Tergeý barlyq yqtimal nusqalardy qarastyrýda.
