Advokat Shyńqýat Baijanov Bátiqa Biláshtiń 10 táýlikke qamaýǵa alynýyna bailanysty málimdeme jasady. Ol qylmystyq istiń negizsiz qozǵalǵanyn aityp, bul jaǵdaidy Serikjan Biláshtiń qoǵamdyq qyzmetimen bailanystyrdy, dep habarlaidy dalanews.kz.
Advokattyń sózinshe, Almaty oblysy Politsiia departamentiniń tergeýshisi Jazira Tasbolatova Bátiqa Biláshke qatysty Qylmystyq kodekstiń 177-babynyń 3-bóligi boiynsha (advokat málimdegendei) qylmystyq is qozǵaǵan. Iske 20 adamnyń aryzy negiz bolǵan.
Baijanovtyń aitýynsha, aryzdanýshylardyń barlyǵy mazmuny birdei shaǵym túsirgen. Onda Biláshke qandastarǵa áleýmettik kómek kórsetemiz dep aqsha jinap, keiin ony jeke basynyń qajetine jaratty degen kúdik keltirilgen.
Alaida qorǵaýshy bul aiyptaýlarmen kelispeitinin jetkizdi.
“Bátiqa Biláshke esh jerde áleýmettik jelilerde nemese basqa alańdarda “qandastarǵa kómek kórsetý úshin aqsha jiberińizder” dep úndeý jasaǵan emes. Sondai-aq basqa adamdar da onyń atynan osyndai aqparat taratpaǵan. Sondyqtan bul aryzdardyń negizi joq dep esepteimiz”, – dedi advokat.
Onyń aitýynsha, mundai jaǵdaida aldymen azamatty resmi túrde shaqyryp, túsinikteme alý, aryzdanýshylarmen bettestirý ótkizý jáne bank qujattaryn zerdeleý siiaqty tergeý áreketteri júrgizilýi tiis edi.
Alaida qorǵaýshynyń sózinshe, quqyq qorǵaý organdary kúdiktini túngi ýaqytta ustap, úiine baryp, arnaiy operatsiia júrgizgen.
“Kámeletke tolmaǵan balalary bar otbasynyń úiine tún ortasynda baryp, uiymdasqan qylmystyq top múshesin ustaǵandai áreket jasaldy. Bul kórshilerdiń de úreiin týǵyzdy”, – dedi ol.
Advokattyń pikirinshe, bul is shetelde turatyn qoǵam belsendisi Serikjan Biláshtiń qyzmetimen bailanysty bolýy múmkin.
Onyń aitýynsha, Serikjan Bilásh AQSh-ta júrip Qytaidaǵy qazaqtardyń máselesin kóterip, qoǵamdyq-saiasi taqyryptardy jii qozǵaidy. Baijanovtyń sózinshe, Bátiqa Biláshke aýdarylǵan qarajattyń barlyǵy Biláshke qoldaý retinde jiberilgen.
“Adamdar maǵan bul aqshany Serikjan Biláshke jetkizý úshin aýdarady dedi. Olar onyń dáristerin qoldaidy, AQSh-taǵy qyzmetine kómekteskisi keledi. Bátiqa Biláshke sol qarajatty tolyqtai Serikjan Biláshke aýdaryp otyrǵanyn aitty”, – dedi qorǵaýshy.
Advokattyń málimdeýinshe, Bilásh óz dáristerinde qoldaý bildirgisi keletin azamattarǵa Bátiqa Biláshtiń esepshotyn kórsetken.
Osyǵan bailanysty qorǵaýshy bul qarajatty alaiaqtyq jolmen iemdený faktisi joq dep esepteidi.
“Bul jerde eshqandai alaiaqtyq joq. Bizdiń oiymyzsha, negizgi maqsat – Serikjan Biláshke jiberiletin qarjy aǵynyn toqtatý. Eger másele tek esepshotta bolsa, ony buǵattaýǵa bolatyn edi. Biraq onyń ornyna Bátiqa Biláshti qylmysker retinde kórsetip, qamaýǵa aldy”, – dedi Baijanov.
Qorǵaýshynyń aitýynsha, 27 maýsymda tergeý soty tergeý aiaqtalǵanǵa deiin Bátima Bidaishidy 10 táýlikke qamaýǵa alý týraly tergeýshiniń ótinishin qanaǵattandyrǵan.
