Qazaqstan ekonomikasy sapaly ósim kórsetip otyr, ol óndiristik bazanyń naqty keńeiýimen qamtamasyz etilgen. Negizgi kapitalǵa salynatyn barlyq salymnyń 80%-dan astamy jeke kózder esebinen júzege asyrylady. Bul týraly Májilis otyrysynda Premer-ministrdiń orynbasary – ulttyq ekonomika ministri Serik Jumanǵarin depýtattardyń JIÓ qurylymy týraly suraqtaryna jaýap berý barysynda málimdedi, dep habarlaidy dalanews.kz.
Onyń aitýynsha, biýdjet shyǵystarynyń ulǵaiýyna qaramastan, ekonomika ishki jáne syrtqy investorlar esebinen damyp keledi: negizgi kapitalǵa salynǵan investitsiia kólemi 22,7 trln teńgege jetse, tikelei sheteldik investitsiialar aǵyny 14,4%-ǵa ósip, $20,5 mlrd-ty qurady.
Premer-ministrdiń orynbasary ónerkásip óndirisi men óńdeý sektoryn negizgi draiverler retinde atady. Mashina jasaý, himiia ónerkásibi jáne qurylys materialdaryn óndirý salalarynda joǵary qarqyn baiqalady, bul elimizdiń óndiristik áleýetiniń artyp otyrǵanyn kórsetedi. Tólem balansyndaǵy bastapqy kiristiń teris saldosyn Qazaqstan ekonomikasynyń ashyqtyǵyn kórsetetin iri jobalardy aiaqtalǵannan keiin investorlardyń paidasyn elden shyǵarýynyń tabiǵi úderisi retinde sipattaldy.
«Qazir biz kúresip jatqan jalǵyz másele – infliatsiia. Ulttyq bankpen jáne qarjy naryǵyn retteýshi organmen birlesip, bul baǵytta tiisti baǵdarlama ázirlendi, jumys júrgizilýde. Infliatsiia tómendep keledi, ótken aidyń qorytyndysy boiynsha 10,4%-dy qurady. Osy aida osyndai tómendeý úrdisin saqtaimyz dep úmittenemin», — dedi Serik Jumanǵarin.
