Serik Shápkenov Qulsary qalasynyń turǵyndarymen kezdeskennen keiin zardap shekken úilerdi aralady, habarlaidy Dalanews.kz.Atyraý oblysynyń TJ jónindegi jedel shtabyna silteme jasap.
Aimaq basshysy Dostyq, Jadyrasyn, Meshit-aýyly yqshamaýdandaryna baryp, tasqynnan úii zardap shekken turǵyndarmen kezdesti. Keiin olardyń usynys-pikirlerin tyńdap, shyǵyndy óteý mehanizmin túsindirdi.
Jadyrasyn yqshamaýdanynyń turǵyndary eger úii apatty jaǵdaida dep tanylsa, aqshalai ótemaqy alý máselesin kóterdi.
- Eger úiińiz apatty dep tanylsa, siz ony buzǵan jaǵdaida tólemaqy ala alasyz. Bul turǵyndardyń qaýipsizdigi maqsatynda jasalady. Biz sizdiń shyǵyndy naryq baǵasyna sáikes tolyq óteimiz, - dedi Serik Shápkenov.
Óńir basshysy turǵyndarǵa keltirilgen shyǵyndy tóleýdegi erekshelikterdi túsindirdi:
- Barlyq zardap shegýshige birdei somany berý múmkin emes. Baǵalaý kezinde kóptegen parametr, atap aitqanda, qurylys materialdarynyń sapasynan úidegi esiktiń sanyna deiin eskeriledi. Sondyqtan apattyq úidi jóndeý jáne tóleý somasy ártúrli. Qazir úidi turýǵa jaramsyz dep tanyǵan kezde ortasha ótemaqy bir sharshy metr úshin shamamen 200-240 myń teńge, - dedi Serik Shápkenov.
Úilerdi aralaǵan soń aimaq basshysy aýdan ákimine turǵyndardy baǵalaý qorytyndysymen tanystyrǵanda jeke-jeke túsindirý jumystaryn kúsheitýdi tapsyrdy.
Qazirgi ýaqytta komissiia 2 940 ótinish qabyldady, 2 727 ótinish qaraýǵa joldandy. 2 624 úige baǵalaý, 2 671 úige tehnikalyq tekserý júrgizildi. 756 úi apatty jaǵdaida dep tanyldy. 100-den astam turǵyn baǵalaý qorytyndysymen tanysyp, ótemaqy somasyna kelisti. Baǵalaý mamandary táýlik boiy jumys isteidi.
