İshki ister mınıstriniń orynbasary Igor Lepeha joldardaǵy beınebaqylaý kameralaryn usynatyn «Sergek» kompanıasyn arab kompanıasyna aýystyrý máselesine qatysty pikir bildirdi, dep habarlaıdy Dalanews.kz.
«Artyqshylyǵy mynada – biryńǵaı tehnıkalyq talaptar belgilengen. Jumysqa ruqsat etiletin barlyq kameralar osy biryńǵaı tehnıkalyq talaptarǵa saı bolýy kerek», – dedi İİM orynbasary.
Qalǵany, onyń aıtýynsha, ákimdiktiń kimmen jumys isteıtinine jáne kimniń sharttary tıimdi ekenine baılanysty qabyldanatyn sheshim.
Eske salaıyq, buǵan deıin “Sergek” Astanadan ketip, beınebaqylaý júıesin endi BAÁ kompanıasy basqaratynyn habarlaǵan edik.
Máslıhat depýtattary jańa operator retinde Birikken Arab Ámirlikteriniń (BAÁ) Presignt kompanıasyn bekitti. Ol aldaǵy bes jylda qaladaǵy beınebaqylaý júıesin basqaratyn bolady.
Presignt kompanıasy 2025-2030 jyldar aralyǵynda Astanadaǵy jańa “Smart City” jobasyn iske asyrýǵa kirisedi. Joba quny 53 mıllıard teńge, bul qarjy tolyqtaı jeke ınvestor esebinen jumsalady. Jobada qazaqstandyq kompanıalardyń úlesi 60% bolmaq.
Jańa operator óz qarajaty esebinen beınebaqylaý ınfraqurylymyn jańǵyrtyp, qaýipsizdikti kúsheıtýge mindetteledi. Kompanıa kelisimshart boıynsha tólemderdi tek jobany tolyq iske qosqannan keıin ǵana alady.
