Senatta Aral óńiri problemalaryn sheshý usynylady
Tóraǵa orynbasary óz sózinde Aral apaty aimaqtyq ta, jahandyq deńgeide de sheshýdi talap etetin qazirgi zamandaǵy ózekti máselelerdiń biri retinde BUU-da tanylǵanyn atap ótti.
– Qazaqstan men Ózbekstan Aral teńizi basseinindegi ekologiialyq jáne áleýmettik-ekonomikalyq daǵdarysty eńserýde birlesken kúsh-jiger jumsap keledi. Eki eldiń prezidentteri Aral óńirindegi ózekti máselelerdi jedel sheshýdi, transshekaralyq sý resýrstaryn utymdy paidalanýdy jáne qorshaǵan ortany qorǵaýdy júieli túrde aityp otyr. Ótip jatqan forýmdy biz eki el, onyń ishinde parlamenttik bailanystar aiasynda júrgizilip jatqan jumystardyń zańdy jalǵasy retinde qarastyramyz, – dedi Tóraǵa orynbasary.
Depýtat Aqmaral Álnazarova da Aral óńirindegi klimattyń áserin jáne tabiǵi ortanyń azyp-tozýyn azaitý maqsatynda Syrdariia ózeni men Soltústik Aral teńizin saqtaý máselelerin sheshýde jalpyǵa birdei qabyldanǵan halyqaralyq konventsiialar men standarttarǵa sáikes túbegeili qadamdar qajettigin atap ótti.
– Ekonomikanyń barlyq salalarynda klimattyń ózgerýine beiimdelý sharalaryn qabyldaý qajet, ásirese aýyl sharýashylyǵynda sý únemdeý tehnologiiasy men ylǵaldy az qajet etetin daqyldarǵa kóshý kerek. Taiaý jyldarda qurǵap qalǵan teńiz túbiniń jalańash jerlerine orman ósirý, mal sharýashylyǵyn damytý úshin sýy ózdiginen shyǵatyn uńǵymalardyń ainalasynda oazis júiesi jasalýy qajet. BUU qamqorlyǵy aiasynda tereń zertteýler júrgizip, tiisti usynymdar ázirlenýi kerek, – dep atap ótti senator Álnazarova.
Konferentsiiaǵa Ózbekstan Respýblikasy Olii Májilisi Senaty Tóraǵasynyń orynbasary Sodik Safoev, DDU Eýropalyq biýrosynyń basshysy Hans Kliýge, USAID jobasynyń jetekshisi Ekaterina Strikeleva qatysyp, sóz sóiledi.
