Senator Darhan Qydyráli óziniń depýtattyq saýalynda shetelge ketken qazaqstandyq jetimderdiń taǵdyry týraly másele kóterdi, dep habarlaidy Dalanews.kz.
Senatordyń aitýynsha, bul másele birneshe ret kóterilgenimen, eshqandai nátije joq.
“Elimizdiń Bas prokýratýrasy 2014 jyly shetel asqan balalardyń taǵdyryna alańdaýshylyq bildirip, arnaiy tekseris júrgizdi, jetim balalar men olardy asyrap alýǵa niet bildirgen azamattardyń biryńǵai málimetter júiesin qurýdy usyndy. Bul tekseristiń nátijesi jáne qabyldanǵan sheshimderdiń oryndalý barysy týraly bizge beimálim. Aitalyq, Ońtústik Afrika, Keniia, Filippin, Meksika, Malta, Argentina siiaqty elderge ketken 120 bala baqylaýǵa alyndy ma? Biryńǵai málimetter júiesi quryldy ma?” – dep surady Darhan Qydyráli.
Qazaqstan shetel azamattary asyrap alǵan balalardyń quqyqtaryn qorǵaý maqsatynda 2010 jyly “Balalardy qorǵaý jáne balany sheteldik asyrap alýǵa qatysty yntymaqtastyq týraly konventsiiany” ratifikatsiialaǵan. Bala quqyqtaryn qorǵaý salasyndaǵy ýákiletti organ bolyp sanalatyn Oqý-aǵartý ministrligi bergen málimetke súiensek, Konventsiiaǵa qol qoiǵaly beri sheteldik azamattar 158 qazaqstandyq balany asyrap alǵan. Sonyń ishinde 2013-2019 jyldary 157 bala shetel assa, sońǵy 4 jylda 1 bala syrtqa shyqqan.
“Konventsiiaǵa qol qoiǵanǵa deiin, 1999-2011 jyldar arasynda sheteldikter 8 805 balany asyrap alǵan. Olardyń 5 217-si qazir kámelettik jasqa tolýyna bailanysty esepten shyǵarylǵan. Kámeletke tolmaǵan 3 588 bala týraly málimet-esep alynyp turady. Ókinishke qarai, esep bermeitinder de az emes. Máselen Ońtústik Afrika eline ketken 30 baladan habar-oshar joq. Sol siiaqty AQSh-taǵy 104, Belgiiadaǵy 113, t.s. balanyń taǵdyryn bilmeimiz. Eń soraqysy, 1999 jylǵa deiin elimizden qansha jetim balanyń shetelge ketkeni týraly múldem málimet joq”, – dedi senator.
Depýtat 1999 jylǵa deiin shetelge ketken jetimder týraly derekter boiynsha zertteý júrgizý, ol balalarǵa biologiialyq ata-anasyn tabýǵa kómektesý, sondai-aq olardyń qalaýy boiynsha elimizdiń azamattyǵyn alýǵa járdemdesýdi usynyp otyr.
