Parlament Senatynda ótken “Azyq-túlik qaýipsizdigi – ulttyq qaýipsizdiktiń negizgi quramdas bóligi” taqyrybyna arnalǵan parlamenttik tyńdaýda senator Amangeldi Tólemisov mektepterdegi tamaqtaný máselesine toqtaldy, dep habarlaidy Dalanews.kz.
Senatordyń aitýynsha, bastaýysh synyp oqýshylary men az qamtylǵan otbasylardyń balalaryna tegin tamaq berilgenimen, mektepterdegi tamaq sapasy alańdaýshylyq týdyryp otyr. Atap aitqanda, azyq-túliktiń sapasy, tamaq daiyndaý deńgeii jáne mázirdiń ártektiligi talapqa sai emes. Sonymen qatar baqylaýdyń jetkiliksizdigi oqýshylar arasynda túrli aýrýdyń taralý qaýpin arttyryp, tipti ýlaný jaǵdailary da kezdesip jatyr.
“Biyl mektepte tegin tamaqtanǵan 578 bala ýlandy. Bul ótken jylmen salystyrǵanda tórt ese kóp. Osyǵan bailanysty qandai sharalar qabyldanyp jatyr?” – dep saýal joldady senator.
Bul suraqqa Densaýlyq saqtaý birinshi vitse-ministri Timýr Sultanǵaziev jaýap berdi.
Onyń aitýynsha, biyl ýlaný oqiǵalaryna qatysty premer-ministrdiń tapsyrmasymen Densaýlyq saqtaý jáne Oqý-aǵartý ministrlikteri jergilikti bilikpen birlese otyryp barlyq mektepte monitoring júrgizgen.
Tekserý nátijesinde mektepterdiń 12%-ynda, iaǵni 840 mekemede túrli zańbuzýshylyq anyqtalǵan. 24 laýazymdy tulǵa ákimshilik jaýapkershilikke tartylyp, 6 is boiynsha materialdar prokýratýraǵa joldanǵan. Alaida Kásipkerlik kodeksine sáikes tekserý aldyn ala eskertý arqyly ǵana júrgiziledi, bul keibir zańbuzýshylyqtardy anyqtaýǵa kedergi keltirýde.
Vitse-ministr jańa ádisterdi usynatynyn aitty. Birinshiden, balalar mekemelerin erekshe baqylaýǵa alynatyn nysandar qataryna engizý qajet. Ekinshiden, mektepterdi eskertýsiz tekserýge múmkindik berý kerek. Sonymen qatar, IýNISEF jáne Dúniejúzilik densaýlyq saqtaý uiymymen birlese otyryp, balalardyń tamaqtaný standarttaryn qaita qaraý jumystary bastalǵan. Osy jyldyń sońyna deiin mektepterdegi jańa mázir bekitiledi dep josparlanýda.
Sultanǵaziev bul bastamalardy júzege asyrý úshin depýtattardyń qoldaý qajet ekenin atap ótti.
