Qarjy monitoringi agenttigi (QMA) blogerlerge litsenziia berý nemese olar úshin jeke reestr qalyptastyrýdy qajet dep eseptemeidi. Vedomstvonyń málimdeýinshe, blogerlerdiń qyzmeti qoldanystaǵy zańnama aiasynda rettelip otyr, dep habarlaidy Dalanews.kz.
Bul týraly agenttik senator Gennadii Shipovskihtiń blogerlerdiń quqyqtyq mártebesi men olardyń jaýapkershiligin arttyrý sharalaryna qatysty depýtattyq saýalyna bergen resmi jaýabynda habarlady.
QMA qoldanystaǵy «Onlain-platformalar men onlain-reklama týraly» zańda bloger (infliýenser) uǵymy naqty aiqyndalǵan jáne olar kásipkerlik qyzmetti Qazaqstan zańnamasyna sai júrgizýge mindetti ekenin atap ótti.
Mádeniet jáne aqparat ministrliginiń ustanymy
Ministrliktiń pikirinshe, blogerlerge qosymsha litsenziia berý nemese jeke tizim jasaý «artyq ákimshilik kedergiler týǵyzyp, birqatar jaǵymsyz saldarǵa ákelýi múmkin».
Ministrlik atap kórsetken negizgi qaýipter mynalar:
- sóz bostandyǵyn shekteý jáne azamattardyń pikirin erkin bildirý jónindegi konstitýtsiialyq quqyǵyn júzege asyrýǵa tosqaýyl qoiý;
- jarnama, buqaralyq aqparat quraldary men onlain-platformalar salasynda jaýapkershilik sharalarynyń qazirdiń ózinde bar bolýyna bailanysty retteýdiń qaitalanýy.
