Semeıde taǵy bir kópfýnksıonaldy keshen salynady. Keshendi «Lokomotıv» stadıonynyń aýmaǵynda salý oılastyrylýda. Budan bólek «Semeı qalasynyń qurylys bólimi» MM  basshysy Rýslan Saqtaǵanov Abaı oblysynyń óńirlik komýnıkasıalar qyzmetinde ótken baspasóz konferensıasynda turǵyn úı sektorynda da qurylys qarqynyn belsendi damytý jalǵasyp jatqandyǵyn atap ótti, – dep habarlaıdy Dalanews.kz.

– 2023 jyly 21 kóppáterli turǵyn úıdiń qurylysy bastaldy jáne jobalar aýyspaly bolyp tabylady. Sondyqtan qurylys áli de jalǵasýda. Salynyp jatqan úılerdi 3 toqsanda paıdalanýǵa berý josparlanǵan. Jıyrma bir úıdiń ishinde 1 352 páter bolady dep eseptelingen. Barlyq páterlerdiń jalpy aýdany 82 myń sharshy metrdi quraıdy, – dedi Rýslan Saqtaǵanov.

Sondaı-aq, Semeı qalasy bólim basshysy qalada turǵyn úılerden basqa mektepter de salynyp jatqandyǵyn jetkizdi.

– Aǵymdaǵy jyldyń 2 toqsanynda 712 páterge arnalǵan 13 kóppáterli turǵyn úı qurylysyn bastaý josparlanýda. Qurylys negizinen qaladaǵy eń belsendi damyp kele jatqan Qaraǵaıly shaǵyn aýdanynda júrgiziledi.

Sonymen qatar, 1 300 oryndyq mekteptiń qurylysy bastaldy. Vodnyı kentinde taǵy bir mektep salynýda, budan basqa aǵymdaǵy jyly Aqsaı, Shyǵys kentterinde jáne Qaraǵaıly shaǵyn aýdanynda taǵy úsh bilim berý mekemesiniń qurylysy bastalady.

2023 jyly Semeı qalasynyń ákimdigi men «Qazmınerals-Demeý» korporatıvtik qory arasyndaǵy kelisim boıynsha Zará shaǵyn aýdanynda 1200 oryndyq mektep qurylysy bastaldy, – dep tolyqtyrdy Rýslan Saqtaǵanov.