Semeide shyrsha bezendirý kezinde biikten qulaǵan muǵalimniń isine qatysty tekseris aiaqtaldy. Eńbek inspektsiiasy jumys berýshiniń kinásin tolyq dáleldedi, dep habarlaidy Dalanews.kz.
“Endi jumys berýshi zardap shekken pedagogtyń em-dom kezeńindegi jalaqysyn tolyq tóleýge jáne emge jumsaǵan shyǵyndaryn óteýge mindetteldi. Is materialdary politsiiaǵa joldanyp, eńbek qaýipsizdigi erejelerin buzý faktisi boiynsha jaýapqa tartý sharalary qolǵa alyndy”, - delingen habarlamada.
Eske salaiyq, buǵan deiin aýyr jaraqat alǵan muǵalimniń áieli bilikten ótemaqy talap etken edi. Muǵalimniń jary Symbat Aianqyzy KTK telearnasyna naýqastyń áli jarty jyl em alýy qajet ekenin jetkizdi.
Onyń aitýynsha, 23 jastaǵy muǵalim Qýat Aitqali ózdiginen júrip-tura almaidy. Sondyqtan ony kútip, qaraý úshin de bir adam qasynda otyrýy qajet.
“Dárigerler onyń miyna quiylǵan qandy toqtatyp, synǵan bas súieginiń jartysyn alyp tastaǵan. Endi eki aidan keiin onyń ornyna plastmassa salý úshin qaita ota jasalady.
Jábirlenýshiniń áieli ustazdarǵa shahar basshysynyń orynbasary men bilim bóliminiń basshylary shyrshanyń basyna shyǵýǵa buiryq bergenin aitady. Semeidegi bas shyrshany bezendirýge barlyǵy on mekteptiń muǵalimderi jumyldyrylǵan eken”, — deidi KTK telearnasy.
Muǵalimniń áieli qaǵaz júzinde bolmasa da, buiryq aýyzsha berilgeni anyq dep otyr. Endi tergeý aiaqtalǵan soń advokat jaldap, ótemaqy talap etý úshin sotqa júginbek.
“Biz barlyǵyn zań júzinde istep jatyrmyz. Qazir 362-baptyń tórtinshi tarmaǵy boiynsha qylmystyq is qozǵaldy. Tergeý júrip jatyr. Barlyǵynan suraq alynyp jatyr. Endi aldaǵy ýaqytta sot ádil ótedi degen sheshimdemiz. Tergeý qalai bitedi, kimdi kináli qylady, biz solarǵa aryz jazyp, bárin sotpen sheshemiz”, – deidi Symbat Aianqyzy.
Aita keteiik, 9 qańtarda aýyr jaraqat alǵan semeilik muǵalim Qýat Aitqalievtyń aýrýhanadan shyqqany týraly jazǵan edik.
Oqý-aǵartý ministri Ǵani Beisembaevtyń aitýynsha, qazirgi ýaqytta muǵalimge ótemaqy tóleý máselesi qarastyrylyp jatyr.
