Semeıde múgedektigi bar jandarǵa arnalǵan arnaýly áleýmettik qyzmet kórsetý ortalyǵynyń qurylysy qarqyndy júrgizilýde, – dep habarlaıdy Dalanews.kz

Bul óńirdegi áleýmettik ınfraqurylymdy damytýǵa baǵyttalǵan mańyzdy jobalardyń biri. Jańa mekeme 100 adamǵa arnalǵan jáne úsh qabatty zamanaýı ǵımarat retinde boı kótermek.

Qazirgi tańda qosymsha korpýstyń qabyrǵalary qalanýda. Qurylysty «Kapıtal Stroy Kz» JSHS júrgizýde. Ǵımarattyń jalpy aýmaǵy – 6,6 myń sharshy metr. Nysan memlekettik arnaıy qor esebinen qarjylandyrylyp jatyr.

Jańa áleýmettik mekeme múgedektigi bar, 18 jastan asqan azamattarǵa qyzmet kórsetedi. Búginde Abaı oblysy boıynsha mundaı qyzmetke muqtaj 101 adam kezekte tur.

Ǵımarat qurylysy bıylǵy jeltoqsan aıynda aıaqtalady josparlanyp otyr. Nysan iske qosylǵan soń jańa jumys oryndary qurylyp, óńirdegi áleýmettik qoldaý deńgeıi arta túspek.