Semei qalasynda ornalasqan áskeri bólimniń komendanttyq vzvodynyń elektrigi, qatardaǵy jaýynger Qyzyr Muhametjanov órtenip jatqan úiden áiel adamdy qutqaryp shyqty. Oqys oqiǵa 10 maýsym kúni keshki ýaqytta oryn alǵan,- dep habarlaidy Dalanews.kz
Qyzyr Muhametjanov áskeri bólimnen shyqqan soń dúkenge bet alǵan. Qalanyń tar kósheleriniń birinen órt sóndirýge tyrysyp jatqan adamdar tobyn baiqaidy.
Janyp jatqan ǵimarattyń terezelerinen janushyra shyqqan aiqaidy estigen áskeri qyzmetshi esh oilanbastan kómekke jetti. Qorshaýdy ainalyp ótken ol tereze áinegin syndyryp, janyp jatqan bólmege kirdi.
Bul kezde qalyń tútinniń saldarynan úi ishinde eshteńe kórinbeitin. Sol sebepti Qyzyr Muhametjanovqa aiqailaǵan daýysqa qulaq túrýge týra keldi. Sonyń arqasynda ol úi ishinen áiel adamdy tez taýyp, syrtqa kóterip alyp shyqty.
Jedel járdem qyzmeti zardap shekken áieldi dereý aýrýhanaǵa jetkizdi. Qazirgi ýaqytta onyń jaǵdaiy turaqty.
Qatardaǵy jaýynger Qyzyr Muhametjanov — eki balanyń ákesi. Ol on jyldan astam ýaqyt boiy Qarýly kúshter qatarynda kelisimshart boiynsha qyzmet etip keledi. Alaida jasaǵan erligin ol batyrlyq dep eseptemeidi.
«Men úshin bul – ádettegi áreket. Qiyn sátte kómekke umtylý – ár azamattyń paryzy. Áskerde úirengen ádetpen jedel ári batyl sheshim qabyldaýǵa daǵdylanǵanmyn», – deidi ol.
