سەمەي قالاسىندا ورنالاسقان اسكەري ءبولىمنىڭ كومەندانتتىق ۆزۆودىنىڭ ەلەكتريگى، قاتارداعى جاۋىنگەر قىزىر مۇحامەتجانوۆ ورتەنىپ جاتقان ۇيدەن ايەل ادامدى قۇتقارىپ شىقتى. وقىس وقيعا 10 ماۋسىم كۇنى كەشكى ۋاقىتتا ورىن العان،- دەپ حابارلايدى Dalanews.kz
قىزىر مۇحامەتجانوۆ اسكەري بولىمنەن شىققان سوڭ دۇكەنگە بەت العان. قالانىڭ تار كوشەلەرىنىڭ بىرىنەن ءورت سوندىرۋگە تىرىسىپ جاتقان ادامدار توبىن بايقايدى.
جانىپ جاتقان عيماراتتىڭ تەرەزەلەرىنەن جانۇشىرا شىققان ايقايدى ەستىگەن اسكەري قىزمەتشى ەش ويلانباستان كومەككە جەتتى. قورشاۋدى اينالىپ وتكەن ول تەرەزە اينەگىن سىندىرىپ، جانىپ جاتقان بولمەگە كىردى.
بۇل كەزدە قالىڭ ءتۇتىننىڭ سالدارىنان ءۇي ىشىندە ەشتەڭە كورىنبەيتىن. سول سەبەپتى قىزىر مۇحامەتجانوۆقا ايقايلاعان داۋىسقا قۇلاق تۇرۋگە تۋرا كەلدى. سونىڭ ارقاسىندا ول ءۇي ىشىنەن ايەل ادامدى تەز تاۋىپ، سىرتقا كوتەرىپ الىپ شىقتى.
جەدەل جاردەم قىزمەتى زارداپ شەككەن ايەلدى دەرەۋ اۋرۋحاناعا جەتكىزدى. قازىرگى ۋاقىتتا ونىڭ جاعدايى تۇراقتى.
قاتارداعى جاۋىنگەر قىزىر مۇحامەتجانوۆ — ەكى بالانىڭ اكەسى. ول ون جىلدان استام ۋاقىت بويى قارۋلى كۇشتەر قاتارىندا كەلىسىمشارت بويىنشا قىزمەت ەتىپ كەلەدى. الايدا جاساعان ەرلىگىن ول باتىرلىق دەپ ەسەپتەمەيدى.
«مەن ءۇشىن بۇل – ادەتتەگى ارەكەت. قيىن ساتتە كومەككە ۇمتىلۋ – ءار ازاماتتىڭ پارىزى. اسكەردە ۇيرەنگەن ادەتپەن جەدەل ءارى باتىل شەشىم قابىلداۋعا داعدىلانعانمىن»، – دەيدى ول.
