Abaidyń 175 jyldyǵyna orai Semeidi aýqymdy ózgerister kútýde. Jańa Arbat ashylyp, Abai men Muhtar Áýezov alańdary jáne ortalyq saiabaq jańartylady. Keibir nysandardy Semeige Qazaqstan qalalary syiǵa berýde.
Qazirgi ýaqytta Almaty oblysy M.Áýezov pen Selevin kósheleriniń qiylysynan et kombinatyna deiingi «Abai joly» jaiaý júrginshiler aimaǵyn qurýǵa kirisken.
Búginde jumystyń 80% aiaqtaldy. Nysandy tapsyrý qyrkúiek aiynda josparlanǵan.
– Almaty oblysy jumystardyń barlyǵyn merziminde oryndaidy. Biz «Abai joly» nysany oryndap jatyrmyz. Qujat boiynsha jumys 18 qyrkúiekte aiaqtalýy tiis. Osy ýaqytqa deiin bári daiyn bolady, biz úlgeremiz. Jumys mamyr aiynyń sońynda bastalyp, búgingi kúnge deiin jumystyń 80% bitti», – dedi jumys óndirisiniń jetekshisi Rafail Hazipov.
Sondai-aq, munda kúzde myńǵa jýyq aǵash otyrǵyzylady. Kóshe boiynda Abaidyń sózderi jazylǵan jeti stela ornatylady. «Tapsyrý kúnine bári daiyn bolady. Kóbinese jergilikti qurylys materialdaryn qoldanyp otyrmyz. Tóselgen tastar, shamdar, oryndyqtar men qoqys jáshikteri osy Semeidiki. Jiektas (bordiýr) Tekeli qalasynan ákelindi, sport jáne balalar alańdary Almaty jasalǵan. Velojoldy «Gordorstroi» kásiporny salady. Sonymen qatar, munda gúl men aǵash otyrǵyzylady» deidi Rafail Hazipov. Jalpy bul jobaǵa 600 mln teńgeden astam qarajat bólingen.
