Beibitkúl Seltanova qazirgi ýaqytta úi sharýasymen ainalysyp jatyr. Sebebi tergeý aiaqtalǵanǵa deiin ony №73 mektep direktory qyzmetinen ýaqytsha bosatqan.
Atalǵan bilim oshaǵynda balany zorlaǵan bolýy múmkin degen kúdiktilerdiń oqitynyn aita keteiik. Beibitkúl bolǵan oqiǵany aýyr qabyldaǵanyn aitady.
– Meniń úsh oqýshymdy bala zorlady dep aiyptap jatqanyn 14 qańtar kúni bildim. Barlyǵy da baisaldy, sabyrly balalar. Oqý úlgerimderi ortasha. Bireýi jetinshi, qalǵan ekeýi segizinshi synypta oqidy, voleibolǵa qatysady. Kiná dáleldenbeiinshe, shý shyǵaryp, meni aiyptaýdyń qajeti joq edi dep oilaimyn, – deidi Beibitkúl Seltanova.
Beibitkúl Seltanovamen birge onyń kúieýi, ýrolog-dáriger Eraly Seltanov ta aiyptalǵan edi.
Buǵan deiin dáriger jaily bloger Janna Ilicheva:
«Eraly Seltanov – depýtattyń uly, balany teksergen aýrýhanada ýrolog bolyp jumys isteidi. Biraq bul sáikestik kezdeisoqtyq bolýy da múmkin», – dep jazǵan edi.
«12 qańtar kúni balany hirýrg teksergen, men qaraǵan joqpyn, tipti ol balanyń júzin de kórgen emespin», – deidi Eraly Seltanov.
Direktordyń qaiyn atasy, dárigerdiń ákesi, 70 jastaǵy oblystyq máslihat depýtaty Saparáli Seltanov ta narazylyǵyn bildirdi.
– Meni joiǵysy keledi degen sybys júrip jatyr. Ne úshin? Ózim depýtatpyn, balam – ýrolog, kelinim – direktor, ulym – politsei. Sonda olardyń jumys isteýge quqy joq pa? Bul balanyń olar úshin mańyzy joq dep oilaimyn, bar bolǵany sebep izdep otyr, túsinesizder ma? Olar neni talap etýde, ne qalaidy – men bilmeimin, biraq olardyń artynda bireýdiń turǵany anyq, – deidi OQO Saryaǵash aýdandyq máslihat depýtaty Saparáli Seltanov.
Derekkózi: stan.kz
