Jambyl oblysynda Qyrǵyzstanmen shekaradaǵy «Aisha bibi» ótkizý beketinde bolǵan janjalǵa bailanysty áiel qylmystyq jaýapkershilikke tartyldy, dep habarlaidy dalanews.kz.
Jambyl aýdandyq sotynyń málimetinshe, oqiǵa 2026 jyldyń mamyr aiynda bolǵan. Sottalýshy otbasymen birge Qyrǵyz Respýblikasynan oralyp, memlekettik shekaradan kezeksiz ótpek bolǵan. Osyǵan bailanysty kezekte turǵan áiel eskertý jasap, ekeýiniń arasynda sózge kelispeýshilik týyndaǵan.
Shekaradan ótkennen keiin jábirlenýshi bolǵan jaǵdaidy uialy telefonyna túsire bastaǵan. Sol sátte ol sottalýshynyń ulynyń qolyndaǵy telefondy qaǵyp jibergen. Buǵan jaýap retinde sottalýshy jábirlenýshige jaqyndap baryp, betinen alaqanymen urǵan. Janjaldy oqiǵa kýágerlerdiń aralasýymen toqtatylǵan.
Sot kinániń taraptardyń aiǵaqtarymen, saraptama qorytyndysymen jáne beinejazbalarmen dáleldengenin atap ótti.
Prokýror sottalýshyǵa 100 saǵat qoǵamdyq jumys taǵaiyndaýdy suraǵan. Áiel óz kinásin tolyq moiyndap, ókinish bildirip, jábirlenýshiden keshirim suraǵan.
Al jábirlenýshi ózine birneshe ret soqqy jasalǵanyn jáne densaýlyǵyna aýyr ziian kelgenin aitqan. Alaida saraptama bul málimdemelerdi rastaǵan joq. Sarapshynyń qorytyndysyna sáikes, keltirilgen jaraqattar densaýlyqqa ziian keltirmegen.
Sot áieldiń kinásin moiyndaýy, ókinýi, bes kámeletke tolmaǵan balasynyń bolýy, buryn sottalmaǵany siiaqty mán-jailardy jeńildetetin jaǵdai retinde eskerdi.
Sot úkimimen áiel Qylmystyq kodekstiń 109-1-baby 2-bóligi 5-tarmaǵy boiynsha kináli dep tanylyp, 100 saǵat qoǵamdyq jumysqa tartyldy. Sonymen qatar jábirlenýshiniń paidasyna 300 myń teńge kóleminde moraldyq ótemaqy óndirildi.
Úkim zańdy kúshine endi.
