Mal sharýashylyǵynda 28 mlrd. teńgeniń ónimi óndirilse, jyl sońyna deiin bul kórsetkish 6 mlrd.-qa artpaq. Aýdanda mal bordaqylaýmen ainalysatyn sharýa qojalyqtarynyń qatary artýda.
«Nurymgrýpp» seriktestigi biyl sáýir aiynda Mankent aýyl okrýginde 10 myń basqa arnalǵan bordaqylaý alańy kesheniniń qurylysyn bastady. Quny 3,5 mlrd. teńgege baǵalanǵan jobany júzege asyrýǵa kásipker 2,4 mlrd. teńge jeke qarajatyn jumsady.
Mal bordaqylaý kesheniniń meńgerýshisi Kenjaly Aitýovtyń aitýynsha keshenniń qurylysy aiaqtalýǵa jaqyn. Búginde munda 6 myń basty bordaqylaýǵa jaǵdai jasalǵan. Jem jetkilikti.
«Óńirimizden jáne Jambyl oblysynan jetkizip alǵanbyz. Etke tapsyrys búginde kórshi Ózbekstan, Qytai, Irannan kóptep túsýde. Qazyǵurt aýdanyndaǵy fermada 6 myń bas malymyz bar. Jalpy qara maldyń basyn 25 myńǵa deiin jetkizýdi kózdep otyrmyz. Etti baǵyttaǵy maldy Soltústik, Shyǵys, Batys Qazaqstandaǵy sharýa qojalyqtarynan satyp alamyz. Sharýashylyǵymyzdy kórip, tájiribe almasýǵa fermerler, jeke azamattar kelip jatady. Mal bordaqylaýdyń qyr-syryn aitýdan jalyqpaimyz. Jumys isteimin degen jastarǵa esigimiz ashyq», – deidi ol.
Aýdandaǵy bar múmkindikti paidalaný esebinen indýstrialandyrý qartasy aiasynda «Óńirler kásipkerligin qoldaý» kartasyna jalpy quny 7,6 mlrd. teńgeni quraityn 12 joba engen.
Sairam aýdandyq aýyl sharýashylyǵy bóliminiń basshysy Nurpapa Kópeevtyń aityp ótkenindei, 2018 jyldyń 9 aiynda qara mal — 205 190 bas, jylqy — 71 689 bas, qoi men eshki — 98809 bas, ótken jylǵa qaraǵanda ósim tiisinshe qara mal 26,1, jylqy 13,7, qoi men eshki -0.7 paiyzdy quraǵan.
«Osy merzimde tiri salmaqta 21 myń tonna et óndirilgen. Jyl basynan 39 januialyq sút aýlalary ashylǵan» deidi ol.
Aita ketetin jáit, oblys deńgeiinde aýyl sharýashylyǵy ónimi boiynsha Sairam aýdanynyń úlesi 12,5 paiyz, aýdan bul kórsetkish boiynsha 1 orynǵa turaqtaǵan.
