Túrkistan oblysy, Sairam aýdanynyń kásipkerleri osy qaǵidany berik ustanady eken. Jyl basynan beri aýdannyń ekonomikalyq kórsetkishi ósip, óndirisi alǵa basýda. Aýdan ákimi Baqtiiar Mamaevtyń aitýynsha jyl basynan bergi segiz aida aýdanda 28,7 mlrd. teńgeniń ónimi óndirilgen.
Ákimdik aýdannyń damý tuǵyrnamasyna sáikes jyl aiaǵyna deiin ónim óndirý kólemin 38 mlrd. teńgege jetkizýdi kózdep otyr.
Aýdandaǵy óńdeý ónerkásibi órken jaiyp keledi. Óńdeýmen ainalysatyn jańa kásiporyndar ashylýda, al jumys istep jatqandarynyń kókjiegi keńeiýde. Aitalyq, Áiteke bi aýylyndaǵy «DALA FRUIT.KZ» kásiporny qarqyndy baý jobasyn ulǵaityp, aýyl sharýashylyǵy ónimderin óńdeitin tsehty iske qosty, osynyń nátijesinde qosymsha 13 jumys orny ashyldy. Aqsý aýylynda «ALATEX» kásipornynyń tigin tsehy iske qosylyp, 17 adam jumysqa turdy. Budan bólek «Rahmanqulov» jáne «Bella Mebel» jihaz fabrikasynyń ónim óndirý kólemi ulǵaitylyp, qosymsha 23 adam eki qolǵa bir kúrek tapty, – deidi aýdan basshysy.
Aýdan memlekettik baǵdarlamalarǵa da belsendi túrde atsalysýda. Indýstriialandyrý kartasynyń «Óńirler kásipkerligin qoldaý" jobasyna Sairamda jalpy quny 7,8 mlrd. teńgelik 13 joba engen, ázirgi tańda 8 joba iske qosylyp, ónim óndirýde. Bularǵa 400-ge jýyq jumys orny ashylǵan.
Biylǵy jyldyń aiaǵyna deiin atalǵan baǵdarlama sheńberinde jalpy quny 2 mlrd. teńgeni quraǵan «Birlik-4» JShS-niń aýyl sharýashylyǵy ónimderin óńdeitin keshen qurylysy iske qosylmaq. Bul óz kezeginde jańadan 150 adamdy jumyspen qamtýǵa múmkindik beredi.
Aýdannyń tirshiliginde ilgerileý baryn baiqaǵan investorlar da Sairamǵa qarjy quiýǵa qulyqty. Aýdan ákiminiń dereginshe, 2018 jyldyń 8 aiynda aýdanǵa 11,7 mlrd.teńge investitsiia tartylypty.
