Almatynyń Túrksib aýdanynda jańa qalalyq kitaphana jumysyn bastady. Bul týraly Almaty qalasy Mádeniet basqarmasynyń baspasóz qyzmeti habarlady, dep habarlaidy dalanews.kz.
Jańa kitaphana Memleket basshysy Qasym-Jomart Toqaevtyń qoǵamda kitap oqý mádenietin damytýǵa jáne ziiatkerlik áleýetti arttyrýǵa baǵyttalǵan «Oqityn ult» bastamasy aiasynda ashyldy.
Jańa qalalyq kitaphana – turǵyndardyń kitap oqýyna, bilim alýyna jáne bos ýaqytyn mazmundy ótkizýine arnalǵan zamanaýi mádeni-aǵartýshylyq keńistik. Kitaphananyń jalpy aýdany 340 sharshy metr, al kitap qory 10 myńnan astam basylymdy qamtidy.
Munda oqyrmandardyń jas erekshelikteri men qyzyǵýshylyqtary eskerilip, qazaq, orys jáne shet tilderindegi kórkem ádebiet, balalar ádebieti, tanymdyq jáne ǵylymi-kópshilik basylymdar, sondai-aq túrli janrdaǵy zamanaýi kitaptar usynylǵan.
Kelýshiler úshin jaily oqý zaly, kitaptardy úige alyp oqýǵa múmkindik beretin abonement bólimi, balalarǵa arnalǵan aimaqtar, kompiýterlermen jabdyqtalǵan jumys orny, arnaiy qurylǵylar jáne kitaptardy óz betinshe alyp, qaitarýǵa arnalǵan «aqyldy sóreler» qarastyrylǵan. Zamanaýi tehnologiia kitap alý jáne qaitarý úderisin oqyrmandar úshin barynsha yńǵaily ári jyldam etedi.
Jańa mádeni keńistik aýdan turǵyndarynyń kitap oqýǵa degen qyzyǵýshylyǵyn arttyrýǵa, sondai-aq olardyń mádeni jáne ziiatkerlik damýyna qolaily jaǵdai jasaýǵa baǵyttalǵan.
Mekenjaiy: Túrksib aýdany, Qonaev atyndaǵy baý-baqsha kooperativiniń aýmaǵy, 336/37.
Jumys ýaqyty: kún saiyn saǵat 09:00-den 20:00-ge deiin.
Qazirgi tańda Almatyda 32 qalalyq kitaphana jumys isteidi. Onyń jeteýi táýlik boiy, iaǵni 24/7 rejiminde qyzmet kórsetedi.
Sonymen qatar turǵyndardyń kitapqa qoljetimdiligin arttyrý maqsatynda qalanyń saýda ortalyqtarynda kitap beretin eki pýnkt, al kelýshiler kóp jinalatyn oryndarda ózine-ózi qyzmet kórsetýge arnalǵan 32 avtonomdy kitaphana jumys isteidi.
Jańa kitaphananyń ashylýy Túrksib aýdany turǵyndary úshin bilim men mádenietti damytýǵa arnalǵan zamanaýi keńistik qalyptastyryp, kitaphana qyzmetteriniń qoljetimdiligin arttyrýǵa múmkindik beredi.
