Sharany Almaty qalasy ákimdiginiń qoldaýymen «Qazaqstandyq qoǵamdyq damý institýty» KeAQ uiymdastyrdy.
Is-sharaǵa saiasattanýshylar, QazUÝ-dyń professorlyq-oqytýshylyq quramy, magistranttar, ýniversitet doktoranttary jáne QQDI sarapshylary qatysty.
Eksperttik klýb qatysýshylary Memleket basshysynyń sońǵy Joldaýynda aitylǵan saiasi reformalar baǵdarlamasy boiynsha óz pikirlerin bildirip, qazaqstandyq qoǵamdy saiasi transformatsiialaýǵa baǵyttalǵan birinshi kezektegi sharalardy atap ótti. Sondai-aq, sarapshylar bolashaq reformalardyń perspektivalaryn baǵalap, yqtimal táýekelderge taldaý jasady.
«Qazaqstandyq qoǵamdyq damý institýty» KeAQ Basqarma Tóraǵasy Qazbek Maigeldinovtyń moderatorlyǵymen ótken sharada saiasi reformalardyń jańa baǵdarlamasy respýblika ómiriniń barlyq salasyna serpin beretin mańyzdy tarihi kezeń ekeni atap ótildi.
Óz kezeginde Ál-Farabi atyndaǵy QazUÝ Filosofiia jáne saiasattaný fakýltetiniń dekany Bekjan Meiirbaev Prezident joldaýynyń jaǵymdy tustaryn atap ótti:
– Sailaý júiesinde bolatyn ózgerister kriteriilerden bastap, kez kelgen adamnyń, tipti saiasi júiege qatysy joq azamattyń sailaýǵa qatysýyna múmkindik beredi. Otanymyzdyń árbir turǵyny Prezident Joldaýynyń qanshalyqty mańyzdy ekenin túsinýi qajet. Bul – elimizdiń damý bolashaǵy men jańa saiasi baǵytynyń kórinisi, – dedi.
– Memleket basshysy Qasym-Jomart Toqaevtyń referendým institýtyn paidalanýdy qaita bastaýy ózi júrgizip otyrǵan saiasi baǵyttyń mańyzdy quramdas bólikteriniń biri, sondai-aq eldiń saiasi júiesin túbegeili reformalaýǵa jáne azamattardy memlekettik basqarýǵa keńinen tartýy onyń adaldyǵynyń kórinisi. Jariialanǵan saiasi reformalardyń mazmuny men sipaty, onyń ishinde sýperprezidenttik basqarý modelinen shyǵýdy eskere otyryp, elimizdiń negizgi zańyna engizilgen tiisti túzetýlerdi qazaqstandyqtardyń eleýli bóligi qoldaidy dep kútilýde. Konstitýtsiialyq reformany referendým arqyly júzege asyrý, shet elderdegi jáne halyqaralyq uiymdardaǵy saiasi toptar men qalyń jurtshylyq arasynda oń pikir týǵyzýy múmkin, – dep senimdi pikir bildirdi Andrei Chebotariov.
Saiasattanýshy Dina Aikenova eldiń damý baǵytyn aiqyndaý týraly sóz qozǵap, bul baǵytta aldymen saiasat, odan keiin ekonomika mańyzdy ekenine toqtaldy.
«Saiasat resýrstardy bólýge jaǵdai jasaidy, ol bárin ádil sheshýge jaýap beredi. Saiasi júieniń transformatsiiasyna keletin bolsaq, munda eń bastysy – saiasi minez-qulyq normalaryn, qundylyqtaryn, úlgilerin ózgertý» dedi saiasattanýshy Dina Aikenova.
QR Prezidenti janyndaǵy QSZI bas sarapshysy, saiasattanýshy Ádil Kaýkenov Prezident Joldaýynda saiasi júieni júzege asyrýǵa jeteleitin reformalardyń mańyzdy baǵyty kórsetilgenin atap ótti:
– Qasym-Jomart Toqaevtyń jasy men tájiribesi ony oidan shyǵarylǵan popýlizmnen, jeke upai jinaýǵa nemese ózine jańa bilik tetikterin qurýǵa degen umtylystan saqtaidy. Bul turǵyda jergilikti biliktiń kúsheiýi, olardyń biýdjetteri men erkindikke ie bolýy úlken ról atqarady. Sondai-aq, úlken aimaqtardy bólý saldarynan birqatar mańyzdy eldi mekender tiisti nazardan tys qalyp, qarjylandyrýsyz qaldy. Qorytyndy maqsat – «Qańtar qasireti» endi qaitalanbaityn turaqty jáne ádil memlekettik júieni qurý, – dedi saiasattanýshy Ádil Kaýkenov.
Jiynǵa qatysýshylar elimizdegi qoǵamdyq-saiasi ahýaldyń ózekti máseleleri boiynsha pikir bildirip, qalyptasqan jaǵdaiǵa saraptamalyq baǵa berdi jáne olardy sheshýdiń negizgi tásilderin qarastyrdy. Birlesken talqylaýǵa qyzyǵýshylyq tanytqandardyń barlyǵy qatysyp, suraq qoiyp, pikir almasty.
Is-shara barysynda, Qazaqstandyq qoǵamdyq damý institýty jáne Ál-Farabi atyndaǵy Qazaq ulttyq ýniversiteti ózara yntymaqtastyq týraly Memorandýmǵa qol qoidy.
