12 jeltoqsanda Aibek Smadiiarovtyń Syrtqy ister ministrligindegi qyzmetinen ketýi qoǵamda túrli pikir týdyrǵan edi. Birqatar aqparat kózi onyń memlekettik qyzmetten birjola ketip, jeke sektorǵa aýysýy múmkin ekenin jazdy. Alaida bul boljamdar rastalmai, araǵa nebári úsh kún salyp ol Prezident ákimshiliginiń eń yqpaldy qurylymdarynyń biri — Ishki saiasat bóliminiń meńgerýshisi qyzmetine taǵaiyndaldy. Atalǵan kadrlyq sheshimge saiasattanýshy Tolǵanai Úmbetálieva kásibi ári saiasi turǵydan baǵa berdi, dep habarlaidy Dalanews.kz.
Sarapshynyń aitýynsha, Smadiiarovtyń syrtqy saiasattaǵy kópjyldyq tájiribesi onyń ishki saiasattaǵy qyzmetine de oń áser etýi múmkin. Ásirese 2022 jyldan beri Syrtqy ister ministrliginiń resmi ustanymyn túsindirý barysynda onyń kásibiligi, salqynqandylyǵy jáne naqty pozitsiiasy aiqyn kórine bastady, deidi.
“Syrtqy saiasat Ýkrainadaǵy soǵys bastalǵannan keiin ǵana erekshe mańyzǵa ie boldy. Osy kezeńnen bastap onyń ishki saiasatqa tikelei áser etkeni baiqaldy. 2022 jyldan bergi ýaqytty negizge alsaq, Syrtqy ister ministrliginiń ustanymy anyq, naqty ári diplomatiialyq stilde jetkizildi. Bul turǵyda Aibek Smadiiarov ózin kásibi kadr retinde kórsete aldy”, – deidi Tolǵanai Úmbetálieva.
Saiasattanýshy onyń emotsiiaǵa berilmeitin, ustamdy stilin de joǵary baǵalady. Onyń pikirinshe, laýazymdy saiasatker úshin salqynqandy bolý aitarlyqtai artyqshylyq beredi.
“Kásibilik turǵysynan oǵan syn aitý qiyn. Jalpy, saiasatker úshin emotsiiasyn baqylaýda ustai bilý asa mańyzdy. Biliktiń joǵary satysyndaǵy tulǵalar barynsha salqynqandy, ustamdy bolýy tiis. Saiasattaǵy shamadan tys emotsiia, kerisinshe, keri áserin tigizedi. Árine, kei jaǵdaida aldyn ala oilastyrylǵan stsenarii aiasynda emotsiia ádeii kórsetilýi múmkin, bul - strategiianyń bir bóligi. Alaida tutastai alǵanda, emotsiiany basqara alý - saiasatkerdiń eń myqty qyrlarynyń biri dep aitar edim”, – deidi sarapshy.
Onyń sózinshe, ishki saiasatta qysym men emotsiiaǵa jeteleitin jaǵdailar jii kezdesedi. Mundai sátterde sheshimdi sezimge berilmei, aqylmen qabyldaý asa mańyzdy.
“Sondyqtan onyń emotsiiasyn tizgindeý qabileti bolashaqta saiasi mansaby úshin jaqsy múmkindik ashýy ábden múmkin”, - deidi ol.
Sarapshy Smadiiarovtyń ishki saiasatqa aýysýyn Prezident Qasym-Jomart Toqaevpen burynnan qalyptasqan kásibi senimmen bailanystyrady. Onyń pikirinshe, memleket basshysyna ishki saiasatta tájiribeli, senimdi ári júieli oilaityn kadr qajet.
“Toqaev ony mártebesine sai keletin, eń qolaily laýazymǵa ornalastyrdy dep oilaimyn. Prezidenttiń mundai tájiribeli mamandy ózinen alys jibermeýi túsinikti. Ákimshilik qurylymda ishki saiasat baǵyty kadrlyq qajettilikten týyndaǵan bolýy múmkin. Sondyqtan Smadiiarovty “óz adamy” retinde osy salaǵa jaýapty komanda quramyna engizý oryndy sheshim boldy. Endi ol ishki saiasat bólimine jetekshilik etedi. Tiisinshe, el ishinde ne bolyp jatqanynan tolyq habardar bolady ári belgili bir deńgeide yqpal ete alady”, - dep qosty ol.
Aitýynsha, syrtqy jáne ishki saiasat ózara tyǵyz bailanysty uǵymdar.
“Syrtqy saiasat - árdaiym ishki saiasattyń jalǵasy. Sondyqtan bul salada jumys istegen adam ishki protsesterdi de jaqsy túsinedi. Menińshe, bul onyń ózi úshin jańa tájiribe, jańa jumys baǵyty. Endi ol jaǵdaiǵa basqa qyrynan qaraityn bolady. Bul ózgeris eń aldymen Toqaevpen qalyptasqan kásibi senimniń nátijesi”, - dedi ol.
Sarapshynyń paiymynsha, aldaǵy ýaqytta Smadiiarovqa syrtqy jáne ishki saiasatty úilestirý mindeti júktelýi múmkin.
“Onyń negizgi missiiasy da osyǵan bailanysty bolýy yqtimal”, - dep qosty ol.
Sonymen qatar Tolǵanai Úmbetálieva Aibek Smadiiarovtyń mediamen jumys isteý tájiribesine de nazar aýdardy. Ol Syrtqy ister ministrliginde qyzmet etken kezeńde buqaralyq aqparat quraldarymen ashyq ári senimdi bailanys ornata alǵan.
“Balaeva hanymnyń kezeńinde memleket pen BAQ arasyndaǵy qarym-qatynas kúrdelene tústi. Al Smadiiarov, kerisinshe, mediamen tiimdi dialog ornata bildi. Áleýmettik jelilerdegi belsendiligine qaraǵanda, jýrnalistermen senimdi ári ashyq qarym-qatynas qalyptastyrǵan”, - deidi sarapshy.
Saiasattanýshynyń aitýynsha, bul faktorlar onyń ishki saiasattaǵy rólin kúsheitip, aldaǵy ýaqytta yqpaldy tulǵalardyń birine ainalýyna negiz bola alady.
“Onyń naqty jumys stilin ýaqyt kórsetedi. Degenmen qazirgi paiymym boiynsha, ol kásibilikke, quzyrettilikke jáne naqty mindetterdi oryndaýǵa basymdyq beretin sheneýnik”, – dep túiindedi Tolǵanai Úmbetálieva.
