Saiasattanýshy Marat Shibutov Reseige kirgen kezde qazaqstandyqtar smartfonyna ornatatyn ruID qosymshasynyń qaýipsizdigin tekserýdi usyndy, dep habarlaidy Dalanews.kz.
Onyń aitýynsha, bul baǵdarlama qandai málimetterdi jinap, qaida jiberetini belgisiz, ári ony tolyq joiý múmkin be – sony anyqtaý mańyzdy.
Osyǵan bailanysty ol UQK-niń Memlekettik tehnikalyq qyzmeti arnaiy zertteý júrgizýi kerek dep esepteidi.
Aita keteiik, 30 maýsymnan bastap, Resei shetel azamattarynyń memlekettik shekara arqyly kirýi men shyǵýyna qatysty jańa erejeler boiynsha eksperimentti barlyq ótkizý beketterinde iske qosty.
Endi Reseige viza qajet emes elderdiń azamattaryna, sonyń ishinde qazaqstandyqtarǵa, elge kirmei turyp aldyn ala Biryńǵai sáikestendirý jáne aýtentifikatsiia júiesinde tirkeýden ótý jáne ruID mobildi qosymshasy arqyly elektrondy túrde kiretindigi týraly ótinim berý usynylady.
«ruID qosymshasy arqyly Resei Federatsiiasyna kirý týraly ótinimdi toltyrý – erikti sipatqa ie ekenin eskertemiz», – dep habarlaǵan bolatyn buǵan deiin Reseidiń Qazaqstandaǵy elshiligi.
Kirý týraly ótinimdi toltyrmaý shekaralyq baqylaýdan ótýge kedergi keltirmeidi. Alaida Qazaqstan azamattaryna ruID qosymshasyn paidalanýǵa keńes beriledi, sebebi ol Resei aýmaǵynda birqatar qosymsha múmkindikterge jol ashady:
- qoljetimdi memlekettik qyzmetterdi onlain alý;
- reseilik SIM-karta rásimdeý;
- aiyppuldardy, salyq bereshekterin jáne memlekettik alymdardy tóleý.
Jańa erejelerge sai, kirý týraly ótinim aldyn ala – saparǵa keminde 72 saǵat buryn jáne 90 kúnnen erte emes merzimde berilýi tiis.
Shuǵyl jaǵdailarda – mysaly, týystyń aýyryp qalýy nemese qaitys bolýy sekildi erekshe mán-jailar týyndasa, ótinimdi 4 saǵat ishinde rásimdeýge bolady. Ol úshin erekshe jaǵdaidy rastaityn qujattar usynylýy kerek.
